«Мөхәммәдия» мәдрәсәсендә музей эшли башлады
«Мөхәммәдия» мәдрәсәсендә музей эшли башлады
Казандагы «Мөхәммәдия» мәдрәсәсендә күренекле татар мәгърифәтчесе, дин галиме Галимҗан Барудига багышланган халык музее ачылды. Әлеге музей – Баруди мирасына багышланган беренче даими музей экспозициясе.
Мәдрәсә директор урынбасары Зөлфәт хәзрәт Габдуллин сүзләренчә, музей идеясе күп еллар дәвамында өлгергән. Элекке биналарда мәдрәсә тарихына багышланган кечкенә генә бүлмә эшләгән, ул Галимҗан Баруди шәхесенә кызыксынучылар арасында зур популярлык казанган. Биналар яңартылганнан соң, аерым бер залны тулысынча Баруди мирасына багышлау мөмкинлеге туган.
«Галимҗан Баруди – бик зур, бөек шәхес. Шуңа күрә аның исеменә лаеклы музей булдыру безнең өчен мөһим иде. Бу эшне башлап, башыннан ахырына кадәр зур көч куеп башкарган кеше – Разыя ханым. Ул юктан бар тудырып, архивлар белән эшләп, хатлар язып, гаять зур хезмәт башкарды. Монда никадәр көч куелганын белсәгез сез, акча булгач аны бөтен кеше эшли – акчасыз эшләп кара», – диде Зөлфәт хәзрәт.
Музейны оештыручыларның берсе – педагогика фәннәре кандидаты, доцент, Галимҗан Баруди мирасын өйрәнүче Разыя Сәхипова. Экспозицияне булдыруда аңа Гөлназ Һадиева, Алмира Ажыбаева һәм Илдар хәзрәт булышкан. Алар әлеге эшне мәдрәсәдәге төп вазифаларыннан тыш алып барган.
Музейда борынгы китаплар, дәреслекләр, документлар һәм Баруди чоры белән бәйле тарихи материаллар урын алган. Экспозицияне көнкүреш әйберләре белән «гадиләштерү» тәкъдимнәре булса да, оештыручылар белем һәм мәгърифәтне чагылдырган китапларга өстенлек биргән. Теләгән һәркем музейга килеп, экспонатлар һәм материаллар белән таныша ала.
