Чирмешән һәм Әлки мөхтәсибәтләрендә яңа мәчетләр ачылды
Чирмешән һәм Әлки мөхтәсибәтләрендә яңа мәчетләр ачылды
Татарстанда Чирмешән һәм Әлки мөхтәсибәтләрендә яңа мәчетләр ачу тантаналары булып үтте.
Чирмешән районы Урманасты Үтәмеш авылында, моңа кадәр хезмәт иткән мәчет бинасы яраксыз хәлгә килгәч, халыкның һәм иганәчеләрнең тырышлыгы белән яңа мәчет бинасы төзелде. Гыйбадәт йортына “Әкълимә” исеме бирелде. Мәчет төзелеше моннан дүрт элек башлана. Бинаны Чирмешән ягыннан авылга керүче юл уңаенда, революциягә кадәр авылда эшләгән элекке мәчет урынында төзеделәр. Аны сафка бастыруда шушы авылда яшәгән мәрхүм Әкълимә апаның уллары – Хәбир, Хәмит, Радик һәм Ренат Хәсәновлар зур өлеш кертә.
Әлки районы Яңа Әнҗерә авылында моңа кадәр мәчет булмаган, авыл халкы җомга намазларына күрше-тирә авылларга йөрергә мәҗбүр булган. Алар бергә җыелып, киңәшеп, 2021нче елның 1нче маенда мәчет салырга керешәләр. Бу эшләрне иганәче Ринас Шәфигуллин башлап йөри. Төзелеш эшләрен дә авыл халкы үзе башкара. Яңа мәчеткә шушы авылга 1922-1923нче елларда нигез салучы, совет чорында мулла вазифаларын башкарган Шәһит Галимов (1885-1963) хөрмәтенә “Шәһит” исеме бирелде. Хәзерге вакытта бу авылда 15 йортта 46 кеше яши.
“Шәһит” мәчете 40-50 кеше сыйдырышлы итеп агачтан салынды. Тәһарәтханәсе һәм аш бүлмәсе, уку классы бар. Тиздән яңа мәчеттә дин-әхлак дәресләрен башлап җибәрү ниятләнә. Имам вазифаларын Илгиз хәзрәт Гобәйдуллин алып бара.
