ХIажлилуксса чири
Аллагьнал ﷻ цIимилийну гьашину коронавирусрал азаргу духларгун, тамансса инсантуран ХIажлив ххуллу тIивтIунни. Та мубараксса аьрщарайн дакI кIункIу тIисса, амма каши-кьудрат дакъассагу хъиннува чIявусса бухьунссар. Мукунсса Цалва лагътал хъиннува пашман къахъананшиврул Аллагь Тааьланал бигьашиву дурну, ХIажлил чирилуксса чири бусса аьмаллу кIул бувну бур.
Ца мукунсса аьмал хъанай бур жяматращал мизитраву чак баву. Имам Тирмизил луттиравусса хIадисраву тIий бур: «Мизитраву жяматращал кIюрххил-чакгу бувну, чани хъя чиннин зикри буллай авцIуманайн биянтIиссар щаллуну ХIаж ва Оьмра (чIивимур ХIаж) бувссаксса чири».
Аьбдуллагь ибн Оьмардуясса ﷺ хIадисраву увкуну бур: «Фаризасса чак мизитраву бувманан марцIну ХIаж бувссаксса чири чичинтIиссар». Ялагу бувсун бур мудан хъатIан-чак мизитраву бувайманангу мукунмасса чири хьунтIишиву.
Абу Нуаьймлул «ХIильятул-аулия» тIисса луттираву чивчуну бур: «Ахьтта мизитравун ачаврих буссар ХIаж ва Оьмра бувссаксса чири».
Вай хIадисирттайн бувну къуццу тIиманан къабучIиссар мизитраву чак булларча ХIаж баврил бурж цаятува лавгсса ххай икIан. Шикку чивчусса куццуй булларча, чири хьунтIиссар, амма ХIаж баву яла къагьантIиссар.
