Лакку маз лахьхьин ччинан
Лакку маз лахьхьин ччинан
Лакку мазрайсса «Ислам в Лакии» порталданул ниттил мазрал дарсру дихьлахьисса ххуйсса проект хIадур дурну дур. Ванил дайдихьу дурну, Ютуб каналданий ккаккан дунни цалчинсса лакку мазрал дарсру.
Вай дарсру дихлай бур МахIачкъалалив оьрус мазрал ва литературалул, лакку мазрал дарсру дихьлахьисса Жума Оьмалалиева. Лакку мазрал курсру байбивхьуна бувагу лакку маз къакIулминнан маз лахьлан гъира багьансса куццуй.
Вай курсирдал къулайшиву му дур, чIун хьусса чIумал ччитарив Ютуб каналданий ххал дуван хъанай дур дарсру. «Цуксса хIарачат булларчагу арснал оьрчIан лакку маз лахьхьин буван, гъира бакъа, хIарпру лахьхьин дан къахъанай, лахьхьин щяикIан къаччай, багьантту буллай, яла, пайда бакъар куну, цува ивтссия. Гьай-гьай, навагу бюхъу бувагу бакъасса учитель бушиву мукIру хьуну. Цалчинсса дарс дия хIарп «чч» лахьхьин дуллалисса, ччитул сурат экрандалийн дуккайхтура, мютIину щяивкIуна. ОьрчIи-чIюлусса суратругу лях-карах ккаккан дуллай, оьрчIру бизар къахъананну тIуркIулул журалий хIадур дурну дия дарс, ттуща цукунчIав ва даражалий дарс дишин къахьунссия, дакIнийхтуну барчаллагьрай бура ва мюнпатсса даву дуван дакIнийн багьцириннайн», – тIий бур Шакият Шамилова.
Агана лакку маз лахьлан ччай бухьурча, лякъияра «Лаккуй ислам» порталданул Ютубканал. ТIайлабацIу баннав каналданунгу, лакку маз лахьхьин чялиш бувк-миннангу.
