Буттащалсса ихтилат
Ца кьини бутта даврия увкIун, ичIувсса давурттугу дурну, лу буккин, игьалаган щяивкIун ур.
Ппу шава ушиву хIисав хьусса АхIмад ганачIан увкIун, цала дурсса сурат ккаккан дуллан ивкIун ур:
– Мяммай, ургу шиккун. Ва на дав!
– Машааллагь, хъинну ххуйну хьуну дур, – рязи хьуну ур ппу. – Суратрайсса вай щил къатрир?
– Ва хъунмасса къатта ттулли. Хъуна шайхту на ваниву ттула кулпатращал яхъананна.
Арснал суратрай буттан хIисав хьуну бур хъунмасса къатлул чIаравсса ца пукьа-къаттагу.
– Ва чIиви къатта щилли, шиву цу яхъанай уссар? – цIувххуну бур АхIмадлухь.
– Мяммай, ва вилмур къаттар, – тяхъану бувсун бур оьрчIал. – Ина ваниву инавалу яхъанантIиссара, жула ттатта куна. Гагу жуятува личIину цала чIиви къатлуву яхъанай урхха.
ОьрчIал увкусса махъру буттал дакIнивун хъинну бювххун бур. Ганан дахьва бувчIуну бур цала хъинну духIин дакъасса тIул дуршиву, хъунав хьусса ппу цала кулпатрая арх увну. Аллагьная ﷻ, буттая ва цахьра оьрмулул дарс дирхьусса чIивисса арсная нач хьуну дур. ГацIана буттал къатлувун лавгун, багъишла ити куну бур.
– Буттай, на багъишла ити, вий багьайкунсса аякьа къадурнутIий. Ттиния тинай на ина инавалу шиву къаитанна, ачу жущал архIал яхъанан.
– Ттул арс, – куну бур къужлул. – На тачIаввагу вийн сситтуй ягу къаччан бивкIун акъассияв. Ттун ина мудангу ххирассара. Ина багъишла ивтссара, Занналгу жува багъишла битаннав!
