Агь, мискин барцI
Агь, мискин барцI
Ца авадансса Жаппар тIисса яттил заллу ивкIун ур ссуттихунмай цала ятту ариппай тIайла буклай.
Мунал мискинсса чIаххучунал, Ванатил, бивкIун бур ца тта. Ганал миннат бувну бур яттил заллуннахь:
– Ва ттул ттагу битикьай вила яттивух, – куну.
– БикIуча, ттун ци бур, ттулсса дуканххурав? Мунил букансса къюллул хIакь булунссар ина, – куну бур Жаппардул.
– Къюллул хIакь циксса багьантIиссар? – куну, цIувххуну бур Ванатил.
– КIира къуруш цинна, ца къуруш бансса чIилун, – куну бур Жаппардул.
Яла Ванати лавгун, цаннивасса ряхва аьппасилул ялун лирчIми ссурахъищагу дузал дурну, ттагу бувцуну увкIун, арцугу Жаппардухьхьун дуллуну, ттагу яттивун бавкьуну, яттихIухчихь миннат бувну бур:
– Лажинни, ттах чансса личIлулну ургу, на вин, ария зана хьукун, магаричгу баннача, – куну.
Лавгун бур ятту ариппай. Ванатил щаллусса ссутгу, кIигу цала ттая хияллай ларгун дур: ганил чIи ца банавав, кIива банавав, кIива барча цала оьрчI, Аьли, гьаванссар канаки бан, хъуни хьунссар, ссуттил гай ппалуя оьрчIангу, ттуннагу жулардугу дан данна Ххадижахь, тIий.
Ларгун дур дяркъусса к!и. ДуркIун дур гъелисса инт. Ванатил ссавур лапра кIюла дурккун дур, цала ятту ххал бан гай бучIаннин ялугьлай.
Ахирданий бувкIун бур ятту...
Ванати ана-анаварну лавгун хьхьичIун, цIувххуну бур:
– Ттул ттал ци иш бур? – куну.
– Вил ттан апатIриххар хьусса!..
– Цукун?
Цукун бикIави, арив бивну ца зурувун, хьхьувай барцI ххявххун, вил тта бувтун бия.
– Агь, мискин барцI Ганисса язугъ! Цуксса захIмат къавхьухьунссия бурцIин вил шаназарва хIайвандалул дянив хьхьувай луглай, ттулмур ххал буллай, – куну бур Ванатил.
