Ччитул оьрчI
АхIмад ва Муса цIакьсса дустал бивкIун бур. Ца кьини гайннан кьатIув лявкъуну бур ччан гъавгъсса ччитул оьрчI. Дустурал га гьаз бувну, аякьа дуллай, хъин бувну бур. Ганин цIагу дирзун дур ЦIиникь. Ччитул оьрчI хъин щейхту кIиннанмагу ччан бивкIун бур га цачIанма шаппай буцин, цувалусса заллу хьун. Амма му иширал хIакъираву байбивхьусса ихтилат мудан къалмакъалданийн кIура баяйсса бивкIун бур.
Ца кьини дустал гава куццуй бястру буллай, куннащал ку дяъвай бивкIун бур:
– Ччитул оьрчI ттулли! - увкуну бур АхIмадлул, - ва цалчин ттун ххал хьуна, ванин дукрагу на дулайссия!
– Вил бакъар, ттулли му! – сси бизлай ивкIун ур Муса. – Мунил ччаннайх буккансса йод на шаппату лавсъссия, ная му хъин бувсса!
Микку чIаххурайсса яттиккаччи ссинжирдания итххявххун, ччитул оьрчIал чулухунмай ххявххун бавчуну бур. Мусал вев увкуну бур:
– АхIмад, кьабитича ччитул оьрчI, лихъу, ххассал хьу! - куну, танкI дурну чIаравсса мурхьхьирайн лавхъун ур.
АхIмад тIурча, нигьа къаувсун, ттархь гьаз дурну, галай дуллай ккаччи лихъан бувну, ччитул оьрчI ххассал бувну бур. Аьлагъужа бавсса чIаххучугу ялун увккун, ккаччи бувгьуну бур.
– Да, ва ччитул оьрчI щилли? - тIий сситтуйну цIухлан ивкIун ур чIаххучу.
– Ттулли, - увкуну бур АхIмадлул.
Муса тIурча, мурхьирайва щяивкIун, пахъ агьну, ссихI къадуклай ивкIун ур.
