“Дарцусса” сурат

Ца шяравусса школалий дуклай ивкIун ур Даниял тIисса оьрчI. Га ивкIун ур дусшиву дуван кIулсса, архIал дуклакиминнащал авкьусса оьрчI. Ганал магьирну суратру дувайсса диркIун дур, школалийгу гьунар буну дуклай ивкIун ур. Данияллул архитектор хьунсса хиял бивкIун бур.

Ца чIумал школалий баян бувну бур суратру даврил конкурс. Ххув хьуманансса бахшишнугу дирхьуну дур планшет. Данияллул исвагьисса сурат хIадур дурну, ганин цIа «Ттизаманнул шагьру» дирзун дур. Аммарив цакуну сир экьилавгун, сурат зия хьуну дур. Гьунттимур кьини цала даву учительницахьхьун дулун хIадур хьуну ивкIсса оьрчI хъинну пашман хьуну, ци банссарив къакIулну ливчIун ур.

Бан-бит бухлавгсса Даниял компьютерданух щяивкIун, цаламуниха лархьхьусса суратрах луглан ивкIун ур. Художниктурал сайтрай ляркъуну дур цанна дакI дакьинсса сурат. Ганийсса цIагу, цаппара рангругу даххана дурну, принтерданува дуккан дурну дур.

Конкурсрай Данияллул суратрал циняв хIайран бувну бур. Сайки директорналгума цIа дурну дур:

– Даниял, ина пагьмулул заллу ура, вия ххуйсса архитектор укканссия!

Амма суратру дишай дарсирал учительница вихшала дакъасса кунма ганал суратрах буруглай бивкIун бур. Яла телефондалуву цирив ххалгу дурну, Данияллуйн цила кабинетравун оьвкуну бур:

– Даниял, ттун художниктурал сайтраву хъинну вилмуниха лархьхьусса сурат ляркъунни. Амма гикку цаманал цIа дур. Та мяйжаннугу вил суратрив?

ОьрчIал къюкI ват-ват тIий ришлан диркIун дур. Жаваб дулун ччай, амма кьакьарттува махъ къабуклай ливчIун ур. КIура авну шавай ливхъун ур. Ганан бувчIлай бивкIун бур цала духIин дакъасса тIул дуршиву. Конкурсрай цаяра дурсса цIарду дакIнин дагьлай хъиннува начливун агьну ур.

Гьунттимур кIюрххил Даниял учительницачIан лавгун, тIайланма гьарзад бувсун бур:

– ТIайлассар, на интернетрава сурат «дарцуссия», чансса дахханагу дурну ттуламурну ккалли дуван ччай уссияв. Мунияту ттун я цIарду даву, я бахшиш лайкь дакъассар.

Учительницал пиш увкуну бур:

– Барчаллагь, Даниял, ина ххуйсса тIул дурунни ттухь тIайламур бувсун. КIулну икIу, тIайлашиврул ва аьдилшиврул инсан гьаз увайссар. ХатIарду бакьин бан шайссар, амма вихшала зана дитан захIматссар.

Учительницал оьрчIахьхьун ихтияр дуллуну дур цамур сурат хIадур дурну ларсун учIан. Данияллул дахьва шамулчинмур кIану бувгьуну бур, амма ганал дакI рязину, рахIатну диркIун дур. Ганан бувчIуну бур тIайлашиву ку чIумал захIматнугу, му цIакьсса гьану бушиву.