Суал-жаваб

Ттун бавссар «Аль-Ка́фиру́н» тIисса Кьуръандалул сура ккалан къабучIиссар тIий. Буссарив мукунсса иш диндалуву?

Цайми сурарду кунма, «Аль-Кафирун» тIимур сурагу буккин бучIиссар, чири шайссар. Цаппара чакурдиву буккин ккаккан бувнугу буссар. Буккайни тIайлану, гъалатI къахьунну, исвагьину буккин аьркинссар. («ТухIфатуль-мухIтаж»)

Жаназалул чак буллалисса чIумал шанма ща бувну бацIан аьркинссар тIутIаву тIайлассарив?

Жаназалул чак буллалими шанма ягу ххишаласса щару бувну бацIарча хъинссар. Идавсил хIадисраву увкуну бур: «Шанма ща бувну жаназалул чак бувманал бунагьру багъишла битайссар». Му куццуй, шанма ща буваншиврул, яла чанну арула инсан икIан аьркинссар. ХьхьичI имам, хъирив кIи-кIия авцIусса шанма ща бувайссар. Ряха инсан ухьурча, ца цувалу ацIайссар, ганал хъиривгу кIи-кIия авцIусса кIива ща бувайссар. Имамнал хъирив мукьа акъа акъахьурча, кIи-кIия авцIуну кIива хха бувайссар. Шама ухьурча, ца ацIайссар имамнал махъ, гайми кIия – ганал махъ хха бувну. Имамнал хъирив кIия инсан акъа акъахьурча, ца хха бувну имамнал хъирив бацIайссар. («ТухIфатуль-мухIтаж»)

Ттун бавссар хIалалну маша бувайсса инсаннан хъунмасса чири шайссар тIий. Буссарив мукун, цанма маэшат буллалиманан чири цукун хьун бюхъайссар?

Кьуръандалуву увкуну бур (мяъна): «Аллагьнал ﷻ хIалал дурссар дахху-ласу, хIарам дурссар рибаъ (процент) ласаву» («Аль-Бакьара» суралул 275-мур аят).

Мукунма, Кьуръандалуву тIий бур (мяъна): «…Аьрщарайх ппив хьуну зунма маэшат тIалав буллалияра» («Джумуаь» суралул 10-мур аят).

ХIадисраву увкуну бур: «Аьдилшиву, тIайлашиву дусса машачи Кьиямасса кьини изантIиссар сиддикьтуращал ва шагьидтуращал архIал» (Тирмизи).

Цамур хIадисраву увкуну бур: «ТIайлашиву дусса дахху-ласучи Кьиямасса кьини Аьрширал ххютулу ацIан антIиссар» (Дайлами).

Ялагу увкуну бур: «Зу маша, дахху-ласу дувара, мунивур бусса маэшатрал ацIва бутIул урчIва бутIа» - куну. (Ибрагьим, аль-ХIарби, Саид бин Мансур).

Вай аятирттава ва хIадисирттава кIул хъанай бур аьдлулий маша буллалиманан хъунмасса чири бушиву.