Гъанминнаяр гъанми
Жула буттахъал учала бур архсса маччачунаяр ххуйсса чIаххучу хъинссар тIисса. Цанчирча, анаварну аьркин хьусса чIумал чIаххучунал кумаг ччяни бияйссар, гъансса инсан ияннин.
Идавсил ﷺ увкуну бур: «Ттухь Жабраил малаикнал мукун чIявуну бусайва чIаххуращал ххуйсса арарду бугьаврия, сайки, ттун ххива чIаххул ттула ирс ласайминнавун буххансса». Мукун хъуннасса агьамшиву дуллуну дур Исламраву чIаххуран.
ЧIаххулгу буссар шанма журасса: жуйва ца хIакь бусса – ми бусурман бакъасса чIаххулли; жуйва кIива хIакь бусса – ми бусурмансса чIаххул; жуйва шанма хIакь бусса – бусурмансса, маччасса чIаххул.
Идавсил ﷺ хIадисраву увкуну бур: «Аллагьнайн ﷻ ва Кьиямасса кьинилийн вихманал хIурмат бувача чIаххучунаха».
Мунияту, жунма къабучIиссар чIаххуран цукунчIавсса зарал буван. Зарал къабувну кьабитавугу къагьассар, гайннаясса заралгу бухIан аьркинссар; зарал бувсса чIаххучунангу хъинбала буван аьркинссар.
Ца аьлимчунан бавну бур чIаххурал оьрчI аьтIисса чIу. Гай аьтIий бивкIун бур бурж лахъан къахъанай, къатри даххан, кьатIув личIан багьлай бушиву чIалай. Ганал чIаххурал буржгу лавхъун, къатри даххаврия ххассал бувну бур.
Цама салихIсса адиминал къатлуву кIулли чIяву хьуну бур. Щарссанил ганахь увкуну бур ччиту битан аьркинни куну. Амма лас рязи къавхьуну ур, ччитуя нигьа бувсун кIулли чIаххурачIан къалихъаншиврул.
Бусурманчунал буржри чIаххура-хьхьун ссалам булаву, цIухху-бусу ва яхшихаш баву, къашавай шайхту бурган лагаву, ххаришивруву ва пашманшивруву чIарав бацIаву, бивкIу хьусса чIумалгу шайсса кумаг баву. ЧIаххурал чIавахьулттавун ягу хъювун буруглан къабучIиссар, гайннал хъанних ва душварах буруглан къабучIиссар, гайннан ва гайннал къатлун зарал хьунмур буллан къабучIиссар. ЧIаххучунал хатIардай аьй къадурну, ашкара къабувну, кIучI бувайссар. Гайннал оьрчIру вилами кунма оьмуния мурахас буван аьркинссар, гайннан ххуймур лахьхьин буван аьркинссар.
КутIану учин, бусурманнал дянив дуруччин аьркинсса циняр адавру кIилийну, шамлийну гужну щаллу дуван аьркинссар чIаххурал дянив.
