Байран барча хьуннав!
Ассаламу аьлайкум ва рахIматуллагьи ва баракатугьу! Ххирасса уссурвал ва ссурвал! ДакIнийхтуну барча тIий ура жула ялун нанисса мубараксса Зумаритавал кьини – зумалул, дуаьрдал, эбадатрал, марцIсса тавбалул ва рувхIанийсса дахханашивурттал вибувцIусса Рамазан зурул ахир дуллалисса байран.
Ва байрандалул жунна дакIнин дутлатиссар Исламрал бюхтулсса кьимат буллусса хасиятру: цIими бушиву, ка-кумаг, цашиву, аякьа. Зула гъанминнащалсса дахIаву цIакь дуллали, мюхтажминнах къулагъас дувара, чIаравми ххари буллали – муниву дуссар байрандалул хIакьсса мяъна.
Ва кьини ляличIисса дуаьртту дуллай ура цала гъан-маччаминная ва кулпатирттая архну, хасъсса аьралий операциялийсса жула уссурвараха. Аллагьнал ﷻ тайннал дакIру цIакь даннав, оьмуния буруччиннав, оьрмурду лахъи баннав. Заннал цIимилийну жула аьрщарай паракьатшиву, дакьаву хьуннав, циняв анаварсса мутталий цIуллуну-сагъну шаппай зана бикIан нясив баннав!
Аллагьнал ﷻ кьамул даннав жула зумарду, дуаьртту, хъинсса ниятру, хIакьмунил ххуллий кьянкьашиву дулуннав, дакIурдиву гьарза хьуннав дазу-зума дакъасса Заннал неъматирттайнсса щукру. Зумаритавал байрандалул жула къатравун барачатшиву ва ххаришиву духхан даннав, цашиву цIакь хьуннав, салихIшиврийн, хIурматрайн, куннан ку ххирашиврийн тIайла бацIан баннав. Барча хьуннав байран!
