Джумадуль-авваль барз
Джумадуль-авваль барз
Ноябрьданий байбихьлахьиссар Джумадуль-авваль барз. Бусурманнал календарьданувусса гьарца зурул тарихийсса ва рувхIанийсса агьамшиву хъуннассар. Кьуръандалуву увкуну буссар (мяъна): «Аллагьнал ﷻ дирхьусса низамрайну шинаву буссар ацIния кIива барз. Мукун нясив бувссар дуниял-аьлам ляхъан бувсса кьини» («Тавба» тIисса суралул 36-мур аят). Ва аятрал тасттикь буллалиссар гьарца зурул агьамшиву. Джумадуль авваль зуруву хьуссар бусурманнал тарихран агьамшиву хъуннасса ишру.
Муъталийсса талатаву
629-ку шинал 3000 бусурманчу щуссар 200 000 саллатI усса Византиянал империялул аьралуннащал.
МухIаммад Идавсил ﷺ гьан увну икIссар Бусра шагьрулул бакIчиначIан Ислам кьамул дува тIисса чагъар лавсун ХIарис ибн Оьмайр. Амма Балка тIисса кIанттай асхIаб увгьуну, ивкIуссар. Мунин жавабран Идавсил ﷺ гьан бувссар Зайд ибн ХIарис бакIчисса аьрал. Мюрщисса оьрчIаран, хъаннин, хъунив хьуминнан, цала килисардаву лабивкIминнан зарал мабувари, мурхьру мабичари, къатри лекьан мадувари куну дюъгу дирхьуссар. Джумадуль-авваль зуруй хьусса талатавриву чIивисса бусурманнал аьрал ххув хьуссар Византиянал аьралуннаяр.
Идавсил ﷺ Хадижат щарну буцаву
Хадижатлун га чIумал диркIссар 40 шин, МухIаммад ﷺ Идавсин – 25. Хадижатлун МухIаммадлул ﷺ ххаллисса аьмал-хасият ккарккукун, ганан щар хьун хIукму бувссар, Идавсгу ﷺ рязи хьуну бувцуссар. Му иш хьуссар Джумадуль-авваль зуруй. Гайннал цачIу яхъанай 25 шин дурссар, 6 оьрчIгу бувссар. Цалчин МухIаммад Идавсийн ﷺ вих хьуну Ислам кьамул дурсса инсан хьуссар Хадижат.
Идавсил ﷺ мачча-гъанми дунияллия лагаву
Джумадуль-авваль зуруй накьлу хьуссар МухIаммад Идавсил ﷺ буттал ппу АьбдулмутIтIалиб. ИвчIан хьхьичI, мяйра шинавусса арснал арс МухIаммад ﷺ АьбдулмутIтIалиблул тапшур увссар цала арснайн Абу-ТIалиблуйн.
Идавсил ﷺ ххирасса душ ФатIима дунияллия лавгссар Джумадуль-авваль зуруй оьрмулул 28 шинаву.
Идавсил ﷺ асхIаб ва бусурманнал шамулчинма халиф Оьмар ибн аль-ХатIтIаблулгу дуниял кьадиртссар ва зуруй.
Душнил душ баву
Джумадуль-авваль зуруй Идавсил ﷺ оьрмулуву ххарисса иш хьуссар – ФатIиман ва Аьлин душ бувссар. Ганин дирзссар Зайнаб тIисса цIа.
