Бусурмантал – уссурвалли

Бусурмантал – уссурвалли

Аллагь Тааьланал щалва бусурманнал уммат уссурвалну хьун бувну бур. Кьуръандалуву увкну бур (мяъна): «ХIакьну, муъминтал ( Аллагьнайн ﷻ иман дирхьуми) – уссурвалли» (сура «АльХIужурат» суралул 10 аят).

МухIаммад ХIабибуллагьнал ﷺ хIадисраву увкуну бур: «Бусурманчу – бусурманчунал уссури. Ганал цала уссий зулму къабантIиссар, кумаг къабувну кьаикIантIиссар, захIматшиврувун агьан къаитантIиссар» (Муслим).

Жува МухIаммадлул ﷺ умматравасса диндалул уссурвал бушиву хъинну хъунмасса неъматри, мунихлу мудан щукрулий бикIангу аьркинссару. Уссурварал дянивсса багьу-бизулувугу дуссар биттур дуван аьркинсса адабру ва шартIру.

• ХIакьинусса кьини жунма чара бакъа аьркинссар куннащал ку ххавхсса уссурвал бакьил буллан, миннал дянив душманшиврул куртIсса мархри итабакьиннин.

• Бусурманчувнан аьркинссар цалла диндалул уссурварал ва ссурварал диялдакъашивуртту кIучI дуллан, ашкара хьун къадиртун. Жунма кIулсса куццуй, яла хъуними бунагьирттаву шамулчинмур кIанай зуна баву буссар. Муксса захIматсса бунагь бунувагу, Шариаьтрал хьхьичI му тасттикь бувну, танмихI буваншиврул мукьа бара икIан аьркинссар. Цува имамнан ккаккарчагума, ялагу шама бара акъахьурча зуна бувминнан танмихI буван къашайссар. Зуна буллалими шама инсаннан ккаккарчагу, гайннахь ихтияр дакъассар муния бусан, мукьилчинма бара акъанува. Бусарча, Шариаьтраву гайннан танмихI бувайссар 80 ттархь рирщуну, инсаннай бакъу бивхьунутIий. Циванни Аллагьу Тааьланал мукун хъунмасса бунагь баву тасттикь буван вайксса шартIру дирхьусса? Инсаннал хIурмат, узданшиву дуруччиншиврул!

• Бусурманчув аьркин бакъасса, щак багьан бувайсса кIанттурдавун занан къааьркинссар. Жулва буттахъал учайссия: «Ца инсаннан цалва чу къашаваймунил чIарав бавцIуну лявкъукун, га бивххун бур «Ва ххуйсса чу бивкIссания къашаваймунил чIарав къабацIантIиссия», – куну. Жунмагу щаккирайсса кIанттурдай бацIанмагу къабучIир. Масъала щин-унугу инсан хьхьувай клубраву ххал хьурча, га гиву таравихIчак буллай ухьунссар тIисса пикри къахьунссархха. Мукунсса кIанттурдавун ци дуллан лагайссарив цинявннан кIулли. Мунияту бусурмачувнан цайнма аьркин бакъасса щакру биян къабулланшиврул гай кIанттурдачIан гъан хьунвагу къабучIиссар.

• Бусурманчунал буржну хъанахъиссар гаманал узданшиву дуруччаву. Цалва хьхьичI устазтурая, имамтурая, аьлимтурая, муридтурая оьккину гъалгъа тIисса чIумал кьацI бавщуну щяикIан къабучIиссар. Мукун паракьатну икIаву мунафикьшиврул лишаннавасса цари. Жула диндалул уссурварахлу ва ссурварахлу букларча, аьркин хьусса чIумал жулва чIарав ацIанмагу лякъинтIиссар.

МУСЛИМ РАМАЗАНОВ