Загьидшиврул ахъулсса
КIулну бикIи, дунияллул неъматирттая арх хьуманал дакI Алллагь Тааьланал авадан дувантIиссар, мунан къаччарчагу дунияллул хъусгу дулунтIиссар. СалихIинтуравасса цаннал укунсса махъру увкуссар: «Я Аллагь, Вияту арх хьуманан цир ляркъусса, ВичIан гъан хьума ссаятур махIрум хьусса?! Щак бакъа, тIайлабацIу къавхьуссар Аллагьная акъа цамуния рязиманан, цаманайн лаизаймангу зарал бивссар!»
Ца инсаннал цIувххуну бур цала янналий мачI дизлай щяивкIсса Ибрагьим ибн Адгьамлухь: «Да Ибрагьим, Аллагьнал ци дуллур вин Балх шагьрулул бакIчишиврухлу?» Ибрагьимлул увкуну бур: «Аллагьнал ттун дуллунни вил аькьлулуща лаласун къахьунтIимур». Яла Ибрагьимлул цала канихьсса ххалаххи хьхьиривун палцIгу бувну, га зана битаву Аллагьнахь чIа увкуну, дуаь дурну дур. Муссят хьхьирива бувккун бур хъунисса балугъру, гьарцаннул зумувгу ца-ца мусил ххалаххи бивкIун бур. «Я Аллагь, ттун ттула ххалаххи зана битаву бакъа цамур цичIав къааьркинни!» - куну бур Ибрагьимлул. Яла га инсаннахгу урувгун, Ибрагьимлул увкуну бур: «Вана вари Аллагьнал ттун дуллумур, вил аькьлулун къадурчIаймур».
