Бугъ’ятуль суълук – Пакьирнал мурад
Ххирасса буккулт! Ттигъанну ялун ливчунни аьжам хатIлий лакку мазрай Сайфуллагь-Кьади Башларовлул чивчуну бивкIсса лу. Ваниву щейхнал назмулийну бувсун бур тIарикьатрая, тасаввуфрая. Луттиран цIа дур «бугъ’ятул суълук», ванил мяънагу – «пакьирнал мурад».
ЦIана лу ита бакьин хIадур буллай бур. Жугу кказитрай бишланну чан-чанну бутIрайх бавчIуну.
Хlамд-салатрая мукьах, на зухь хlасул бусаннин,
Мухlтарамсса уссурвал, ттухгу вичlи дишара.
Хlусну ззанни архlалну хlая дусса янищал,
Хlакьирсса зула уссил калам ххуйну ххал бара.
Мухбир цува кьаивтун, калам марцlну ххал бувну,
Оьккимур махlву бувну, ххуймур исбат бувара.
Заннахлуну був аьмал ажрулун мустахlикьссар,
Заннахлу хьуннав куну марцlну пикри бувара.
Малакагу дакъана, гьунаргу чанну буна,
Шайхнал амру камил бан увкумур чичаймара.
Аммаралул зулматрал зулмулуву унува,
Устарнал тlимур буван насихlат бусаймара.
Хьхьуния кьини дурну ттулламур чичларчагу,
Дардирдал чlярушиврул чийхь бусан маъзурмара.
Ва хlалу нафсий (каза) къулай бакъа бунува,
Зу ттунма ххирашиврул вяъзалун вяэзмара.
Цlувххумунин жаваб дан дакl хlайранну дунува,
Хlадурсса кислувумур зуйхгу кlибачlаймара.
Виричунал чувшиву – думуний чумартшивур,
Ва ттула канихь бумур мяш акъа булаймара.
Ттул диндалул уссурвал, дакlнин ххира гьалмахтал,
Зущал калам аьч буллай, таслият дуваймара.
Зу ттуй аьйбгу мадару, щалла аьйб на унугу,
Оьккину лавг оьмрулий даина аьтlиймара.
Дукъарчlай чил цlуцlаврий даруртту буллалаврий,
Ттула дакl мурчlинува навагу хlайранмара.
Насихlатрайн мухlтажну зуяр нава унува,
Зун гьадиятну бував, зугу кьамул бувара.
Ваъза бусан аьркинссар такьвалий аслу бунал,
Ттуха лавхьхьунал гъабар асар бакъа лагайссар.
Ява, ххира уссурвал, ттуйну хъяврин машари,
Аьмал ххуйма ххал увну, аьмал буван аьркинссар.
Цlувххумунил жавабран мухтасарну бусанна,
Камилну зухь бусларчан, луттирду аьркин хьунссар.
Зул дакlру бизар къахьун, янилату къабагьан,
Эбарат кутlанугу чивчумур муътамадссар.
Заннал тавфикь дулуннав, мурадрайн биян баннав,
Зу хlарачат буварча барачат чан бакъассар.
«Валлязина джагьаду» кусса цала каламран,
«Ланагьдиянна» кусса башарат хlукму бувссар.
Истикьаматрайн хьулну такьвалий гьану бивзнан,
Мунан иршад дувансса аьриф такьайюз айссар.
Дунъяллуя зугьд дурну, Заннахлу ихлас дарча,
Кьутбунал мулахlаза хавар бакъа дияйссар.
Дакl нуранийну шайссар, сирру самданий шайссар,
Элму ладунилийну мунал я чани байссар.
Кумагрансса валийтал янин ххал къашай чlумал,
Аьрифтурал мажлисрай мунал цlа зикру шайссар.
Заннал тавфикь дуллуну, зул ихлас сахlихl хьурча,
Ва ттул чансса каламгу зун хъинну бюххантlиссар.
Зу ттуя тlалаб дурсса тlарикьатрал адабру,
Дакlнийхну кьамул барча ваний бумургу гьассар.
Тlарикьат учайсса зад цlа тlайласса ххуллинди,
Хlакъирайну дугьарча, Занначlан вусул шайссар.
Силсила учайссагу цlа оьрватул-вускьари,
Мяънавийсса насабрал санад диян дувайссар.
Хlакьийкьалул сипатрив на зухь цукун бусави,
Му аьрифнал вазийфар, мунил шаъну хъунмассар.
(гихунмайгу буссар)
