Винмагу мува му
Бусурманналнияр гужсса, чIарах къабуккайсса, зия къашайсса, бухлагаву дакъасса ярагъ щилчIав бакъассар. Му ярагъгу – дуаьри. Дуаьлул мяънагу – инсаннал цува заэвшиву, пакьиршиву мукIру хьуну, дуниял-аьлам ляхъан бувсса Заннайн лаизавури.
Дуаьлул яла агьамми шартIругу – дукия хIалалсса дикIаву ва дакIнихтуну, марцIсса ниятрай чIа учавур. Жува чIявуну ишла бувайсса махъру бур «цIуллушиву дулуннав», «барачат бишиннав», «Аллагьнал ﷻ цIими бишиннав», «тIайлабацIу баннав» тIисса. Вайгу дуаьрдури.
Аллагьнал ﷻ увкуну бур (мяъна): «Вихь Ттул лагътурал Ттуяту цIуххирча, ина миннахь буси На минначIан гъаншиву. Ттуйн лаивзун чIа тIиманан жаваб дулунна. Минналгу Ттун жаваб дулача, вих хьуну (иман дирхьуну) – му чIумалли ми тIайласса ххуллийх бачинтIисса» («Аль-Бакьара» тIисса суралул 186-мур аят).
Дуаьлул жаваб анаварну дуллуну ччиманан аьркинссар цайминнаха дуаь дуллан. ХIадисраву увкуну бур: «Дуссар кIира дуаь, хьхьичIух пардав дакъасса: зулмукарнал зулмулухьхьун иривманалсса ва кьюлтIну диндалул уссиха дуаь дуллалиманалсса». Ялагу увкуну бур: «Яла ччяни жаваб дулаймур дуаь – архсса инсаннал цама архманаха дуллалимурди».
Шикку гъалгъа ххуйсса дуаьлияр. Оьссагурив дикIайсса дуаь? ДикIайссар! Мугу нааьна ягу сситтуву увкусса оьккисса махъри.
ХIадисраву увкуну бур: «Бусурманчунал кьюлтIну цала диндалул уссиха дуаь дуварча, малаиктурал учинтIиссар "вингу мува му хьуннав", куну». Мунияту, жува цаманаха зукьлу булларчагу, нааьна дуварчагу, малаиктуралгу жунма мува му чIа учинтIиссар. Мунияту, аькьилманал цаманайн оьккисса махъ къаучинтIиссар, нааьна ягу ссуг къадувантIиссар.
Бачияра щала дунияллийсса бусурмансса жула уссу-ссуннаха ххуйсса дуаьрду дулланнуча, хаснува захIматсса тагьарданувун багьминнаха. Аллагьнал ﷻ кьамул даннав!
