ДИНДАЛУЛ ЖАВГЬАР

ДИНДАЛУЛ ЖАВГЬАР

Рамазан зурул хасшиву

Щукру Аллагьнайн – дукниял-аьламрал Заннайн, жува дазузума дакъасса рахIмуцIимилул хьхьиривун буххан бувну, Рамазан зурул неъматру хIасул хьун нясив бувсса.

Рамазан зуруй ликкан бувссар Кьуръан – махъва-махъсса, Идавсшиврул кьюкьа бартдигьин дурсса, иман думиннан ххуллу ккаккан буллалисса камилсса насихIатну хъанахъисса, цала Идавсийн e ликкан бувсса махъва-махъсса лу. «Ал-Бакьара» суралул 185- мур аятраву увкуну бур: «Рамазан – Кьуръан ликкан бувсса барзри – халкьуннан хIакьмур ва батIулмур личIи буван лахьхьин буллалисса лу». Аллагь Тааьланал Рамазан барз хъун бувну бур муниву ляличIисса даража бусса хьхьу – Лайлатул-кьадри кIучI дурну.

Му хьхьунин Кьуръандалуву щаллусса сура хас бувну бур (мяъна): «На ликкан бав Кьуръан Лайлатул-кьадрилул хьхьуну», - увкуну бур. Яла Аллагь ﷻ Идавсихь e цIухлай ур: «Чари вин кIулну бикIайсса Лайлатул-кьадрилул ссайн учайссарив?». Хъиривмур аятраву бувчIин бувну бур: «Лайлатул-кьадрилул хьхьу – азарва зуруяр ххирассар!» (му хьхьуну дурсса эбадаттIааьтрал даража лахъссар азарва зуруй дурмунияр). Яла бувсун бур му хьхьунил кьимат ва хъуншиву личIайшиву кIюрх дучIаннин. Ва мубараксса зурул хIакъираву МухIаммад Идавсил e увкуну бур: «Ххаришиву дувара ва бюхттулсса, барачатсса барз бучIаврия.

Аллагьнал жуйва бивхьуссар ва зуруй дяхтта зума дугьаву, хьхьувайгу бюхъайсса эбадат даву. Ва зуруй суннатсса (дурну хъинсса) тIул дурманан цамур зуруй фаризамур дурссаксса чири хьунтIиссар. Фаризамур бувманан цамур чIумал арулцIалва бувссаксса чири хьунтIиссар. Рамазан – ссавурданул барзри, ссавур дувайманансса чиригу – Алжанни. Ва рахIатшиврул барзри, муъминчунал маэшат гьарта шайсса барзри. Зума дургьуманан ритансса дукия дуллуманал бунагьру багъишла битантIиссар, Дужжагьрал цIарая мурахас увантIиссар, зума дургьунан кунмасса чиригу хьунтIиссар». АсхIабтурал цIувххуссар: «Зума дургьума дукан увансса каши гьарманачIа къадикIайхха». Мунин Идавсил e укунсса жаваб дуллуссар: «Зума ритан сайки чассаграл касак, накIлил ягу щинал ххув буллуманангу кIукунмасса чири буссар.

Зума дургьуну ивкIманан ритансса хIачIия дуллуманал ттул щаращуя (Кавсар) хIачIантIиссар. Га щаращуя хIавчIма тачIав мякь къахьунтIиссар, Алжаннавун ухханцIакул. Рамазан зурул дайдихьу – рахIматри, дянивалу – багъишла битавури, дайлитIу – Дужжагьрал цIарая ххассал шавури». Цамур хIадисраву увкуну бур: «ЗучIан бувкIунни Рамазан – барачатшиврул барз. Ва зуруй Аллагьнал ﷻ зул ялув тIитIин буллалиссар Цала рахIму-цIими, бунагьру багъишла битлатиссар, дуаьрду кьамул дуллалиссар, зу хъинбалардаву буллалисса бястлил хъирив авцIуссар, малаиктурал хьхьичI зуя пахрулий уссар. Мунияту, ккаккан дувара зула узданшиву, цанчирча, ва зуруй Аллагьнал ﷻ цIимилуя махIрумну ливчIма – алши бакъа ливчIмари».

Бачияра ва зурувусса хъунмасса барачат, чири чIарах буккан къабитан хIарачат буванну. Жула чурххал базурду бунагьру баврия буруччинну, цанчирча, Рамазан зуруй бувсса хъинбалалул чири гьарза шайсса кунма, бунагьрал оьшивугу, миннунсса танмихIгу гужлан шайссар. Рамазан барз хьуннав жула дянивсса арардаву рахIму-цIими гьарза шаврил барзну, Аллагьнаясса ﷻ нигь, ссавур цачIун хьуннав, цанчирча, бусурмансса инсаннан миннуяр хъинсса гьивукьай дакъанутIий.

АЬБДУЛЛАГЬ КЬУРБАНОВ

Барча хьуннав Рамазан барз!

Дагъусттаннал Муфтий шайх АхIмад-афандинал барча бавуртту

Ас-саламу аьлайкум ва рахIматуллагьи ва баракатугь! ХIурмат лавайсса уссурвал ва ссурвал! ДакIнихтуну барча буллай ура зу циняв мубараксса Рамазан барз байбишаврищал. Вай мяйжаннугу барачатсса гьантрай зун насихIат буллай, царагу минутI чIарах дуккан къадиртун, хъиннува хIарачат бувну хъинбаларду, Аллагь ﷻ рязисса давуртту дуллалияра учин ччай ура. Зущава бюхъайсса кумаг бувара, чIарав бацIияра му кумаграх мюхтажминнан. ЦIими бувара зула гъанминнай ва захIматсса иширттавун багьминнай.

Ххирасса уссурвал ва ссурвал, Рамазан – хъинбарардал, марцI шаврил, ссавурданул ва рахIму-цIимилул барзри, мунияту бачияра оьмуния арх хьуну, хъинбалраду гьарза буванну. Заннахь чIа тIий ура ва захIматсса чIумал жула дакIру цIакь даву, пикрирду марцI баву ва чурхардива азарду дуккан даву.

Аллагьнал ﷻ кумаг баннав вай мубараксса гьантри лайкьсса куццуй эбадат дуллай гьан буван. Дугьлагьисса зумарду сававну жува бунагьмуния марцI букканнав! ЧIа тIий ура цинявннан Заннаяту барачатшиву, цIими ва дакIурдивусса хъинсса нанижатру бакIрайн дуккан дувансса кьудрат. Ва жула Ватандалун захIматсса чIумал куннал куннаха дуаьрду дулланну.

Куннал куннаха хIурмат буллай, эбратрансса тIуллу дуллай, кумаг буллай ялапар хъананну. ХьхьичIва-хьхьичIгу, жунма циняв неъматру буллусса Заннайн щукрулий бикIанну.