«Ас-салам» кказитрал вакилнащалсса ихтилат
«Ас-салам» кказитрал вакилтал зий буссар жула республикалул гьарца райондай ва шагьрурдай. Мукунма, Дагъусттаннал кьатIувсса шагьрурдайгу буссар кказит машгьур баврил даву дачин дурну нанисса зузалт. Лакрал райондалий кказит чичаврил ва биян баврил каялувчину уттигъанну ивтссар Ххюлуссуннал шяраватусса Идрис Дибиров. Уттигъанну islamvlakii.ru порталданул администратор Арсланаьли Сулайманов ванащал хьуна авкьуну ихтилат бувну бия.
– Идрис ХIусайнович, буси инава «Ас-саламрал» даврий зий айивхьусса куц. Му цумур шин дия?
– Та айивхьуссарав мяйжанну дакIний бакъар, амма 2000-ку шиннардил дайдихьулийва ттун ва кказитрая бавссия, буккайссия. 2010-ку шинал Каспийск шагьрулийсса «Ас-саламрал» вакилнал кумагчину зий уссияв. ХьхьичIппурттуву халкьуннащал гъалгъа тIун, кказит чичияра учин нач хъанан дикIайва, яла чIун ларгукун вардиш хьунав, ламус къабувну ихтилат буллан бювхъуна. 2011-мур шинал на айивхьура ЧIурттащиял шяраву имамну зий. Му даврий зузисса чIумалгу «Ас-салам» чичаву ва биян баву кьакъадиртссия. Щала райондалий ва барачатсса кказит машгьур буван ттущава шаймур буллай уссияв, хIакьинусса кьинигу ура.
– Кказит чичаву Лакрал райондалий цукун най дур?
– Жу гьарца кIанттайх лагма буккару, кказитрая бусару. БувчIин бувару ва укунмасса кказит бакъашиву, ваниву цайми кказит-журналлаву бакъамур бушиву, багьандаран чичаву къагьашиву, ккалангу аьркиншиву. БуккултрачIан биян баврия тIурча, му ишираву ттул кумагчитал шяраваллавусса имамталли. Имамтал бакъасса, цайми дакI цIуцIисса жула инсантуралгу кумаг бувай. Миннахь хъунмасса барчаллагь тIий ура. Бюхъайнин жувагу биян бувару.
– Давриву цукунсса захIматшивуртту хьуна дакьай?
Гьашинусса яла хъуннамур захIматшиву дия коронавирусрал азар. Цанчирча, интту, подпискалул чIумал ххуллурду лавкьуну, халкьунначIан бухху-букку буллан бюхълай бакъая. Жул отделданул бакIчи кказит чIумуй биян баврий хъинну ялув ацIай. Ялагу ца масъала: цаппараннал ва кказитрал чулухунмай адав-хIурмат бакъашиву дувай, микку-тиккун бувтун ягу ичIаллил занакьалашиннаву ишла бувну лякъай. Мунил сававгу духьунссар къакIулшиву. Мунияту, дакIнин бутан ччива: диндалул кказитирттаву Кьуръандалул аятру, хIадисру бикIайссар, чапалсса кIанайн багьан битан къабучIиссар. Бувккуну махъ кказитран ци буванссарив къакIулну бухьурча, мизитравунмагу биян булувара.
– ДакIнивун бюххансса ишругу шайрив?
– БикIай мукунсса кIанттугу. Утигъанну укунсса иш хьуна: ца шяраву лас ва щарсса кказит чичин рязи хъанай бакъая. Мунил оьрчIру тIурча, аьтIий миннат буллай бия чичакьай, тIий. «Ва диндалул, Аллагьнал ﷻ кказитри…», – тIий аьтIий ия чIивитIу. Му куццуй дуруна подписка. Микку ца жул зузала хъювсул уккавай ия.
– Идрис ХIусайнович, цIана шинайсса подписка ссан дур?
Ялун нанисса шинал подписка лакку мазрай 570-лла, оьрус мазрай – 1320-ра къурушран дацIантIиссар. Цацанихгу баххайссар, лакку мазраймур 47 къурушран, оьрус мазраймур 55-ннин.
– Кказит чичин цукун бюхъайссар?
Му хъинну бигьассар! БучIиссар ттул номерданийн оьвчин ягу чичин 8-988-301- 55-99. Мукунма, as-salam.ru сайтрайхчIин ягу Инстаграмраву @assalam_gazeta тIисса аккаунтравухчIин чичин хьунтIиссар.
– Буккултрахь цукунсса насихIат буванна?
Заннайн щукрулий бикIи диндалия бусласисса кказитжурналлу, луттирду ккалан, передачарду ххал дуллан бюхълай бушиву. Хъама мабитари «Бисмиллагь» учайсса, хIатталив дуаь дуван кару гьаз дувайсса инсан дуснакьравун утлатисса чIунну диркIшиву. Аллагьнал ﷻ дуллумунин кьимат бувара.
