“ОьрчIан лакку маз лахьхьин бувара!”
“ОьрчIан лакку маз лахьхьин бувара!”
Рамазанов ГъазимухIаммадлущалсса ихтилат
ГъазимухIаммад 10 шинай зий ур «Ас-салам» кказит-рал подписка дуллай ва буккултрачIан биян буллай.
– Ас-саламу аьлайкум, Гъази-мухIаммад! Буси виятува, ина часса ура?
– Вааьлайкум ас-салам! На Къурхъиял шяравассара, ттун дур 35 шин. 2008-ку шинал на бувккуссар Дагъусттаннал ХIукуматрал университетрал юридический факультет. Мува чIумал айивхьуссара дин-ислам лахьлай. Университетраву ттул уссия Мавлидин тIисса гьалмахчу. Га хъинну инсаншиву дусса, дакI марцIсса, иман дусса оьрчI ия. Цавагу чак кьакъабитайва. Ганал ттунгу лахьхьин бувуна дин-чак дуллан.
Ца кьини ттула ссурахъу Зайнуттиннул ттун буллуна ЧиркIейлиясса щейх Саид-афандинал чивчусса лу. Га лу бувккукун ттула дакIнивусса тамансса суаллан жавабру ляркъуна. Гава шинал на усттазначIан лавгун, вирд лавсъссия.
Университет бувккуну махъ на увхссияв мадрасалувун. Га бигьасса чIун дакъая, чIярусса захIматшивурттавух уккан багьуна: цIуцIавурду, гъан-маччаминнащал бувчIу-къабувчIурду ва цаймигу. Заннал цIимилийну ттуща бювхъуна гайннува уккан, Аллагьнайн щукру.
Мадрасалува на агьунав «Ас-салам» кказитрал редакциялул кказитру чичайсса ва биян бувайсса отделданувун.
– Буси зува кказитру чичайсса ва биян бувайсса куц.
– Гьарцама зузалал буссар цанма личIи бувсса кIану: масала ца шяравалу, махIла, шагьрулул район. Гиккусса гьарца къатлувун бивну, кказит чичаву цIуххайссар. Гъира буминнал чичай, ца-цавайннан ци кказитрив кIул хьуншиврул пишкашгу бувару. Мунияр махъ цIусса номер буккайхту чIумуй биян буван аьркинссар. Мури жул даву.
ХIакьинусса кьини «Ас-салам» кказит буклай бур 13 мазрай: оьрус, лакку, дарги, яру, лазги, табасаран, азирбижан, къумукь, турк, татар, башкир, таджик ва ингилис. Жула республикалул кьатIув ялапар хъанахъиминнаща бюхъайссар кказит ччимур пучрал отделениялий чичин. Щала Аьрасатнаву хъунисса ва мюрщисса шагьрурдай жул зузалт буссар подписка дуллай ва кказитру бахлай, миннаща машан ласунгу хьунтIиссар. Электрон журалийсса подпискагу дуссар as-salam.ru сайтрай ва телефондалунсса приложениялуву. ЦIуххин ччисса суал булун бучIиссар телефондалувух оьвкуну: 8 (800) 600-65-08.
– Кказитрал чичулт чIявучин цукунсса инсантал бур?
– Оьрус мазраймур кказит хIадур бувайссар бусурман бакъаминнангу буккин гъира бикIансса макьаларду рирщуну, цанчирча, тиражрал чIявумур бутIа оьруснал шагьрурдай баххайнутIий. Вайми мазурдийсса кказитирттаву хъунмур къулагъас дурну дуссар дин-исламрах.
Мунияту, оьрус мазрайсса кказитрал буккултраву чIявуссар бусурман бакъасса халкь. Вайми гьарманал цала-цала мазрайсса язи бувгьуну чичайссар.
ЦIанасса заманнай жагьилтураву кказит буккин личIисса гъира чIалай бакъар, чIявуми чичулт бур бугьарасса оьрмулул инсантал. Амма ттул пикрилий, нитти-буттал цала оьрчIавун буккаврихсса гъира бутларча, ва тагьар ххуй чулиннай даххана хьунссия.
– Лакку мазрайсса буккайми чIявусса бурив?
– Лакку кказит чичай кулпатраву цавагу инсан ниттил мазрай буккин кIулсса ухьурча. Ниттил маз ябаву ва ялун нанисса никирангу лахьхьин баву ттун агьамсса масъалану чIалай бур. Ттун кIулссаксса, жула республикалий буссар лакку мазрал дарсру дишайсса школарду, амма нитти-буттал хIарачат къабуварча, ми дарсирдаягу личIисса мюнпат къахьунссар, оьрчIан цала маз ххуйну къалахьхьинссар. Мунияту, зула оьрчIан ххуйну лакку маз лахьхьин бувара!
Мунин бувну, лакку мазрайсса «Ас-салам» хъанахъиссар жула инсантуран ниттил маз хъама къабитансса кумагчину ва диндалул элму-кIулшилул щаращину. Мунияту ттун ччива ва лакку кказит гьарца лакрал кулпатравун букIлай.
– Ина гьарца кьини личIи-личIисса халкьуннащал хьуна акьайхьунссара. Шайрив дакIний личIансса ишру?
– Мукунсса ишру чIявуссар.
Ца угьарасса инсан уссия оьрмулухун лакку «Ас-салам» чичлай, циняв кказитру цачIун буллалисса. Га адимина дунияллия лавгукун, му аьдат дачин дуруна арснал. Ганал хIакьинусса кьинигу кказит бучIан бувну, щалва кулпатращал бувккуну, мюхчанну ябувай. Мунияту ттун кIулли лакку мазрайсса «Ас-саламрал» архив чу буссарив!
Ялагу ца иш. Ца чIумал подписка дуллай унува ттун нуз тIиртIуна бугьарасса хъамитайпалул. Кказит чича тIий увкIсса кIул шайхту, ганил хъинну ххаригу хьуну бувсуна чак буллан лахьхьин ччай, амма ча лахьхьинссарив къакIулну тамансса хIал хьушиву. Ганил кказитгу чивчуну, гьарца цIусса номер бучIаннин ялугьланна увкуна.
Укунсса иширттал ттул дакIнивун бутай хъиннува хIарачат бивхьуну зунсса гъира.
– Барчаллагь, Гъазиму-хIаммад, жущал ихтилат бувансса чIун лякъаврих. Вин вила давриву Аллагьнал ﷻ кумаг баннав.
– Амин. Зунгу барчаллагь. ЧIа тий ура цинявннан хъинбала-хъиншивуртту ва тIай-лабацIуртту.
«Ислам в Лакии» порталданува
