Идавсил ﷺ душ ФатIима
Идавсил ﷺ душ ФатIима
ФатIима – МухIаммад Идавсил яла ххирамур душри, ганил нину – Идавсил ﷺ кулпат Хадижатри . ФатIима – Исламрал тарихраву ца яла бюхттулсса хъамитайпар, га бивкIссар цIими бушиврул, дакI тIайлашиврул, марцIшиврул, кьянкьашиврул ва вихшала душиврул мисалну.
ФатIима бивкIссар эбадатраву чялишсса, бала-апатIирттачIа ссавур дусса, Идавсил ﷺ хъуншиву ва бюхттулшиву кIулсса хъамитайпа. Ганил Идавсияту ﷺ хъинну чIярусса хасиятру ларсъссар, сайки Аьишал увкуну бур: «Ттун цама инсан къаккавкссар такссава гужну МухIаммад Идавсиха ﷺ лархьхьусса занакьалашин, тIул-тIабиаьт, хасият ва багьу-бизу бусса» (Тирмизи).
ФатIима бивкIссар цила буттал чул бищайсса цIакьсса ттарцIну, сайки ганийн «цила буттал нину» учайсса бивкIун бур. Ганил циняв иширттаву гьурттушин дайсса диркIун дур: бусурманнал гъазаватирттаву – санитаркану, диндалул иширттаву – дурккучу-аьлимчуну ва м.ц.
ФатIима бивкIун бур эмаратсса, чIалачIин лап ххуйсса, дакI хъинсса, кIукIлусса, хIалимсса, иминсса инсан. Мудан тIайламунил чул бугьайсса бивкIун бур, тачIав щялмахъ бувсун бакъар.
Идавсин ﷺ ФатIима хъинну ххирасса бивкIун бур, га ялун буххайхту лавай ивзун, душнил ненттабакIрайн ппай учайсса бивкIун бур. ХIадисраву увкуну бур: «ФатIима ттул чурххал касак кунмассар, ванин къаччан бикIан бувманал ттун къаччан бикIан бувссар» (Аль-Бухари). Гагу цила бутта ххирану, мудан ганахлу буккан хIадурну бивкIссар.
Ца кьини Идавс ﷺ чакливу сужда буллай унува ца диндакъул ганайн бивкIусса хIайвандалул вихссака дирчуссар, гай дукьан аьтIий левчунма ФатIима бувкIссар. Ганил иттав макь ккарккукун, Идавсил душ паракьатгу бувну, баян бувссар Заннал цанна ххувшаву дулунтIишиву.
Аллагь Тааьланал амрулийну Идавсил ﷺ ФатIима щар буллуссар цала ссурахъин Аьли-асхIаблун . Мискинну бунугу, ФатIимал ва Аьлил цачIусса оьрму талихIсса бивкIссар.
ФатIимал тIабиаьтравусса яла бюхттулмур хасият диркIссар иминшиву. Ца чIумал Идавсил ﷺ ганихь цIувххуссар хъамитайпалун яла хъинмур цири, куну. «Яла хъинмур – ттун чил инсантал къаккаккаву ва чил инсантуран на къаккаккавур», - увкуссар ФатIимал . Микку Идавсил цала душ ххирагу бувну увкуссар: «Гъансса дакIру кунниха ку лархьхьусса дикIайсса дур», - куну.
Бургияра ФатIимал иминшиву, буттайн ва ласнайн мютIишиву! Гай хасиятру жуннагу лаласун, ххирасса ссурвал!
