Лакку душварал ифтар
Лакку душварал ифтар
Апрель зурул 7-нний МахIачкъалалив, «Королевский дворец» тIисса банкетру бай залдануву, хьунни ЦIуссалакрал (ЦIуминалийминналгу) райондалул душварал ифтар. Ванил сиптачитал бия Муфтиятрал просвещениялул хъаннил отдел ва ЦIуссалакрал райондалул ЦIуминалийсса хъаннил отделданий каялувшиву дуллалисса Аьбдуллаева Ххадижа.
Зумаритаврил цачIусса урцIухун батIаву мудангу мюнпатсса ихтилатру ва дюххансса нашидрур. Яргсса сценкардур, оьрчIансса викторинардур. Авадансса дия ва кьинисса ифтарданул программагу. БавтIцири барча буллалисса, бюххансса ихтилатру бувна ЦIуссалакрал Имамтурал советрал хъунама Мансур Хаваевлул, философиялул элмурдал доктор Асият Буттаевал ва цаймигу бусравсса инсантурал. Нашидру увкуна Луиза Шахдиловал, Шагьалай МахIаммадовал ва Анисат АьбдуллатIиповал. Хъуннасса ххаришиву дия ифтарданий Палестиннавасса душру ва оьрчIру бушавриягу.
«Жу 300-350 инсан учIанссар тIий буссияв, сайки 500-ксса инсан увкIунни. Ва иширавагу чIалай бур жулва ссурваврал ифтарданулгу, Аллагьнаха эбадат дуваврилгу хIурмат бушиву. Ххуйсса гьурттушинна дурна яруссанналгу. ЦIуминалий, лак бакъагу, цайми миллатругу яхъанай бур, сайки 30 процент чил миллатирттал бур, мунийну хасну лак личIи буван хъанай бакъар. Ва дурсса даврил чIарав бавцIуцириннайнгу барчаллагьрай бура. ДакIнийхтуну чIа тIий бура цинявннан цIуллушиву, цIими ва барачат! Бувсса цадакьартту ва цаймигу хъиншивуртту Аллагьу Тааьланал кьамул дурну, миннухсса чири ххи баннав. Ва ифтарданулгу, ялун нанисса Зумаритавал байрандалулгу барачатрайну бала-апатIру, азарду арх даннав, дунияллий дакьаву хьуннав», – увкуна Ххадижа Аьбдуллаевал. «Ва ифтарданул 500 инсаннал дакIру хъиншиврул, ххуйшиврул, цIимилул чаннал дуцIин дурссар. ЦIуссалакрал душру, цалва къайгъурдугу, тIюваллил ишругу кьабивтун, миллатрал дукиярдугу дурну, миллатрал лаххиярдаву бувкIунни байрандалийн. АьнтIикIахъул кунма, чIюлуну, авурну, дакIру тIиртIуну, аьчухну. Палестиннавасса къумасса хъамал хIайранну бия жулла культуралия, дакI-аьмал хъиншиврия, хъамаллураха хIурмат бушиврия. Ва даву лахъсса даражалий гьаншиврул биялсса захIмат бивхьусса душварайн, Ххадижатлуйн, Эльмирайн, Анисатлуйн, Иринайн, барчаллагьрай бура. ЦIуминалийсса хъаннил отделданий каялувшиву дуллай бур Ххадижа Аьбдуллаева. ХIарачат бусса душ бур. Вай ттул ученицахъулли. Гьарзат хIисавравун ларсун, ххуйну хIадур хьуну бия», – увкуна Асият Буттаевал.
ПатIимат Рамазанова
