Идавсил оьрмулун хас бувсса конкурс

Идавсил оьрмулун хас бувсса конкурс

Лакрал ва Ккуллал районнай хьунни элмулул конкурс. Шиккусса халкьуннан лахьхьин багьлай бия «Избранные эпизоды из жизни Пророка ﷺ» тIисса, имам Шамиллул заманнайсса аьлимчу МухIаммад-ТIагьир Кьарахъил чивчусса, хъун бакъасса лу.

Гъумук конкурс нани бувну бия Хъун-мизитраву ва райондалул культуралул къатраву. Ккуллал райондалий конкурс бия Ваччиял школалий.

Га кьини лаккуйн бувкIун бия Зунттал округрайсса сайки циняв районнаясса хъамал, Муфтиятрал вакил Казим Темирбулатов бакIчину.

Конкурсрая бувсуна Ккуллал райондалул имамтурал бакIчи МухIаммад-Маннар Бариевлул: «Жул агьаммур мурад буссия жула инсантуран МухIаммад Идавсил ﷺ оьрмулия, ганал хасият-тIабиаьтрая кIул баву. Азаруннийн бивсса луттирду бавчIуссия сайки гьарца къатлувун бухлай Лакрал ва Ккуллал районнай. Гьуртту хьун бивтссар так шийва ялапар хъанахъими, мичча-тичча, шагьрурдая бувкIми къабивт-ссар. МухIаммад Идавсил ﷺ оьрмулул тарих кIулсса чIумал жула дакIурдиву ганал чулиннайсса ччаву ххи хьунтIиссар, дин хъиннура цIакьну дугьансса гъира багьантIиссар».

«Конкурс баврил сиптачину хьуссар Ваччиял имам Дибир-хIажи Рамазанов. Жугу ванал кумагчиталну буссияв. Ванахьгу, призру хIадур буван арцуйну кумаг бувминнахьгу барчаллагь тIий ура. Гьарманал бувсса кумаг, цадакьа Аллагьнал ﷻ кьамул баннав. Конкурсрал хьхьичIунмур кьастгу дахьва призру бачIаву дакъарча, Идавсиясса ﷺ элму-кIулши дачIавур», – бувсуна Лакрал райондалул имам МухIаммад Саламовлул.

Ккуллал райондалул КIулшиву дулаврил управлениялул хъунама Оьмариев Жамалуттиннул кIицI лавгуна укунсса конкурсирттал агьамшиву: «ХIакьину жул райондалий хъинну ххаллилсса даву дурунни Муфтиятрал вакилтурал. Шикку гьуртту хьун сайки циняв шяраваллавасса агьали бувкIун бур. Яла хъунаманан мяйцIалунния ххишаласса шинну дур, яла чIивиманан дур мяйра шин. ЧIявуми бур хъами-душру. Барчаллагь тIий буру ва дуван кабавкьуминнахь, шиная шинайн ваниву гьуртту хъанахъмигу чIяву хьуннав», – увкунни ванал.

Конкурсраву гьуртту хьуна мюрщими классирдал дуклаки оьрчIая тIайла хьуну, бугьарасса оьрмулувун бияннинсса агьали. Низамрал ялув бавцIуну бия Муфтиятрал зузалт ва кумагран бувкIсса волонтертал. Гьуртту хьуминнан багьлай бия кIицI лавгсса луттиравасса кьува суалданухьхьун жаваб дулун. Анавар къабувккун чичиншиврул шанна ссят дуллуну дия.

Конкурсрал цалчинмур призну ккаккан бувну бия цIусса автомашина Хундай Солярис, кIилчинмур кIану бувгьуманан 300 азарда къуруш дулунтIиссар, шамулчинмур бувгьума 150 азарда къуруш ласун лайкь хьунтIиссар. Вай бакъасса, ялагу багьлул кьиматсса арулла бахшиш хIадур дурну дия.