Курсру лакьаврин хас бувсса мажлисру

Курсру лакьаврин хас бувсса мажлисру

ЦIуминалийсса ЦIуссалакрал шяраву хьунни дуклаки оьрчIансса курсирдал хIасил даврин хас бувсса мажлис. Шиккун бувкIун бия щалва райондалий мизитирттавун занай бивкIсса оьрчIру ва душру, нину-ппухълу ва шяраваллал имамтал.

Мажлис бачин бувуна «Аманат» тIисса, диндалул мероприятиярду дузал дувайсса группалул каялувчи АхIмад ХIасанхановлул.

Ялун нанисса ник духIин-мяърипатрай тарбия даврин хас бувсса насихIатру бувсуна Караман шяраваллил имам МухIаммадрасул Аьшикьовлул ва Новостройрал имам Мансур Хаваевлул.

Райондалул имамнал чулуха барчаллагьрал чагъарду буллуну кIицI лавгуна чялишну чIарав бацIаву дурми: Аьбдуллаев АьбдурахIман, Сулайманов Камалуттин, Щейхаьлиев Гилани, Жиржисова Лейла, ЦIаххаева Зулайхат.

Ахирданий циняв бусурманнаха цинявннал архIал дуаь дуруна.

Гъинттулсса оьрчIал курсру къуртал шаврин хасну Гъази-Гъумукгу хьунни хъуннасса шадлугъ ва оьрчIал дянив бувунни диндалул кIулшивурттал конкурс, «Бусурман диндалул гьанурду» тIисса луттирайн бувну.

Мажлисрай махъру лавхъунни Лакрал райондалул имам МухIаммад Майрановлул ва просвещениялул отделданул зузала Насрудинов Муъминнул.

Гъумучиял паркравун бавтIсса оьрчIал ва душварал дянив бувунни спортрал бяст-ччаллу.

Диндалул элмурдал конкурсраву цалчинмур кIану бувгьунни Кьубатусса Асаев Ражаблул, 2-мур – КIундиясса Аьлиева Марияннул ва 3-мур – КIундиясса МахIаммадхIажиева Амирал. Вайннан дуллунни арцуйнусса бахшишру. Мукунма, циняв гьуртту хьусса оьрчIан пишкаш бувунни чак байсса халичарду, душваран – лачакру.