ЧукIнав – цIусса мизит
Шяраваллил агьали тарбия баврил чулухуннайсса даву мизитрал дачин дуллалиссар
Ххуйсса мизит бунни ЧукIуннал шяраваллил жяматралгу. Муфтиятрал вакилтал, жяматийсса ишккаккулт, шяраваллил агьлу, мюрщи оьрчIру бавтIун, шадлугърал тагьарданий тIивтIунни.
«ЧукIуннал жямат хъунмасса хIаллай ялугьлай буссия мизит тIитIаврих. Сайки мукьра шинал мутталий тамансса жагьилтал шагьрурдая букIлай, чялишну хIала бухлай бивкIунни ва чирилунсса давривух. Харжлугъгу жяматралли бакIрайн ларсъсса. Сайки цаягу инсан тинайну къаавцIуну, шайма шайкунсса кумаг буллай, кашилух бурувгун ка кIидахIлай бивкIунни. Утти ттул дакIниву хъуннасса ххаришиву дур, буттал шяраваллил жагьилтал цалва гуж, кьудрат, бюхъу ва мизит буваврийн тIайла бувну бивкIун тIий, даву укун ххуйну бакIуйн дуккан дурну тIий. Жагьилтал цачIун бавтIун, ккуркки лавгун, цанмагу, жяматрангу мюнпат бумуниха зий бивкIун тIий, миннал дянивсса уссурвалшиврийсса арарду цIакь хьуну тIий.
Ттул хъунмасса умудгу бур, шяраваллил жямат, уттиния тинмайгу кунная кув арх къабуцлай, цачIунмай хьуну, цачIу ххаришивугу, кьурчIишивугу хьунадакьланссар тIий, цачIу жяматрал кьинилул масъалартту бартбигьавриха зунссар тIий. Умудрай ура агьалинан къулайшиву хьун дуллалисса цаймигу давурттахагу зунссар шяраваллил жагьилтал тIий. Мукунсса давурттугу хьхьичIун ласарду», – укун буслай ур ва даврил сиптачитуравасса ва сакиншинначитуравасса ца – Аьли НякIучиев. Ва барчаллагьрай ур мизит бан кумаг буллай бивкIминнайн, тIитIлатIисса мажлисрай гьуртту хьун бувкIцириннайн. Ва цувагу ххаллилсса буттал, дазу дакъа Лакку кIану ххирасса шаэр Аьбдулкьадир НякIучиевлул арсри.
Цува Аьли миннат буллай ур, цалламур цIа гьаз мадари, циняв бавкьуну, гъира буну зий бивкIссар, командалул дурсса давур тIий.
Зун гъира багьанну лагма лаган бавугу гьунардиха. Аьлил кIицI лавгунни, Аллагьнал ﷻ къатта шяраву цIу буккан баву – шяравалу цIу дуккан даврил дайдихьур тIий бушиву активистъталгу. Футболданий буккайминнал ххуйсса командагу сакин дурну душиву. Жямат лагма лаган бувансса цаймигу ххуйсса проектру бартдигьлай зунтIишиву. Жувагу дуллалимуниву тIайлабацIу чIа тIий, цIусса мизитрацIун цIу-цIусса ххуй-хъиншивуртту чIа тIий буру. Агьалинаву иман, инсап цIакь хьуннав, ЧукIуннал аьрщарай барачат ликканнав!
