Лакку хъаннил зияратру
Мубараксса мухIаррам зурул байбихьулий Лакрал районнал имамтурал ва Дагъусттаннал Муфтиятрал идаралий зузисса лакку душваврал хIарачатрайну ца кьини шанна ххуйсса даву хьунни.
Июль зурул 31-нний МахIачкъалаливсса Хъун мизит-рачIа, кIюрххила гъирарай, цачIун батIлай бия лакрал хъами-душру. Вайннувух бия Мариян Илиясовал цIанийсса хъаннил «Дараччи» фондрал душру, «Встреча» тIисса лакрал интеллигенциялул вотсап-группалул вакилтал, «Илчи» ва «Ас-салам» кказитирттал зузалт ва цаймигу.
Тичча машинарттай кьюкьа дархIуну лавгуна Сепаратор поселокрайсса Дагъусттаннал Муфтий, щайх АхIмад-афандинал къатрачIан. Муфтийнал маслихIат-райсса ихтилатрахгу вичIи дирхьуну, Буйнакскаллал райондалийн аьрххи бавхIуна. Вайннащал архIал бия лакрал имамталгу: Мансур Хаваев – ЦIуссалакрал райондалул ЦIуминалийсса имам, МухIаммадманнар Бариев – Ккуллал райондалул имам ва МухIаммадрасул МахIадов – МахIачкъалаливсса Сайфуллагь-кьади Башларовлул цIанийсса мизитрал имам.
Буйнакскаллал райондалий вай цал бивуна Ялув Гъазанишливсса Ухссавнил Ккавкказуллал цалчинма муфтий, НицIавкIратусса щайх, 3 тIарикьатрал устаз Сайфуллагь-Кьади Башларовлул зияратрайн. Тикку Яруссаннал райондалиясса агьлугу бия. Зияратраха аякьа дуллалисса хъамитайпа буслай бия сайки гьарца кьини архсса зунттал шяраваллавасса агьлу бучIайшиву зияратрайн.
Яла лавгуна ЧиркIайннал Саэд-Афандинал зияратрайн. Шикку аьлимтурал Кьуръангу бувккуну дуаьрду дуруна. Зияратирттайн бувкIмигу кьинибархан дуаьрдай бия.
Шаппай бачай ххуллий вай бувцуна ахттайнсса дукан ва бигьалаган ЧиркIайннал водохранилищалийн. Тиккусса хъамаллушиндаралсса буван бакIрайн лавсун бия ЧиркIайннал щайх Саэд Апаннинал арс, Исламрал элмурдал доктор Аьбдуллагь Ацаевлул.
Тамансса бия та кьини зияратирттайн цалчин бувкIмигу, Муфтийнал ихтилатрах вичIи дишинсса тIайлабацIу хьумигу.
Дагъусттаннал гуманитар институтрал профессор Асият Буттаева ва «Дараччилул» хъунмур Гульшан Хасаева цинявгу лакку душваврал цIанияту барчаллагьрай бур: ва давриха зузиминнал биялсса хIарачат бивхьуну бур лайкьсса даражалийсса даву щаллу дуван. Мяйжаннугу, ца зумату кунма, циняв дакIру чаннасса, тIааьнсса асардал дурцIуну дур тIий бия. Укунсса аьрххирдал жува гъангу буллалиссару, жулла дакIурдиву имангу цIакь дуллалиссар. Аллагьнал ﷻ мукьахунмайгу зияратирттайн занансса кьудрат дулуннав. КIицI ларгсса давриха зий бивкIминнал захIмат Заннан кьамулну лякъиннав. Зияратирттайн бияврил барачат щалвагу миллатрайн бияннав!
