ЦIУССА ХАВАРДУ

ЦIУССА ХАВАРДУ

ЧукIнав мизит тIивтIунни

МухIаммад Идавсил ﷺ хIадисраву увкуну бур: «Ва дунияллий мизит бувсса инсаннан Аллагь Тааьланал Алжаннаву къатри дувантIиссар», – куну. АльхIамдулиллагь щукру, махъсса ппуртуву Дагъусттаннай, хаснува лакрал щархъаву чIявусса мизитру буллай бур. Уттигъанну Лаккуй цIусса мизит тIивтIунни ЧукIуннал шяравугу. Мизит тIитIаву шяраваллил жамятран хъуннасса байранну хьунни.

Октябрьданул 24-нний мизит тIитIаврил шадлугъран хасну хъунмасса мажлис бувунни. Барачатсса Рабиоьл-аввал зурул хатирданун дурккунни мавлудгу. Мажлисрайн бавтIун бия шяраваллил жямят, администрациялул вакилтал, къуллугъчитал, райондалийсса шяраваллал имамтал. Жунма кIулли, циксса хъунисса аьлимтал, диндалул инсантал бувкссарив лакрал аьрщарая. ЧукIуннал шяраву мизит тIитIаву савав хьуну, шиччагу букканнав халкьуннан мюнпат бусса дурккучутал! Мизит тIитIаврицIун бавхIуну гьарца шяравучунал къатлувун барачатшиву дагьннав, шяравалу цIудукканнав, дин-ислам гьаз хьуннав! Редакциялул чулуха барча буллай буру ЧукIуннал жямат шяраву хьусса хъинну агьамсса иширащал.

Кьимат лахъсса бахшиш

МахIачкъалалив хьунни СМИлуву терроризмрайн ва экстремизрайн къарши дурсса публикациярдал конкурсаву ххув хьуминнан бахшишру дулаврил мажлис. Республикалул лагрулийсса конкурсраву хьхьичIунсса кIанттурду бувгьуминнавух кIицI ларгунни ШавкIратусса АхIмад Аьлишаевлул «Асса» радиолий дурсса передача. АхIмад Аьлишаевлун кьимат лавайсса диплом буллунни Дагъусттаннал миллатрал политикалул министр Энрик Муслимовлул.

Зиярат цIу буккан буллай

Гъумук Хъун-бярнил чIарав буссар зиярат. Шикку увччуну уссар Турк-Сельджукнава Дагъусттаннайн увкIсса Гъази-Кьаландар. Мунал цIаниятури тIар Гъумучиял цIанил ялун «Гъази» тIисса цIа ларчIсса. ДакI цIуцIисса а г ь а л и н а л х I а р а ч а т р а й н у хIакьинусса кьини Гъази-Кьаландардул зиярат бакьин бувну, цIу буккан буллай бур. ХIакьинусса кьини гьав дусса кIанттай тамансса давуртту дурну, лагма-ялтту марцIшиву, исвагьишиву дурну дур. ЯлунчIил зияратрал ялув хьхьичIазаманнай бивкIсса куццуйсса къуппагу бувантIиссар тIар. Гъази-Кьаландардул оьрмулул тарихрая буккияра 5-мур лажиндарай.

Цувалу майданнив – Ушанов АьбдурахIман

Лас, щарсса, ряхва оьрчI. Дагъусттаннай укунсса кулпатру чансса бакъар. Вайннал кулпатран кумагран ЦIуссаккуллал администрациялул аьрщи дуллуну дур. Дурцуну дур щин, ток, газ. АьбдурахIман айивхьуну ур къатри дуллай. Амма цакуну ванал щарссанин оьккисса диагноз дирхьуну дур – онкология. Къатри дуллантIиссарив, ягу даруртту ласунтIиссарив? Пикри булланвагу аьркин бакъар: ляхълахъисса циняв арцу харж дуллан багьну бур щарсса хъин дуван. Ва бур шанна шинал хьхьичIсса хавар. ХIакьинусса кьини тIурча, азар 4-мур стадиялийн дирну, къатри баврия ихтилатвагу бакъар: АьбдурахIманнун багьлай бур шания бизан къахъанахъисса кулпатрай аякьа дуллан, даврин укканссавагу мажал къахъанай.

ЦIана кулпат ялапар хъанай бур чIумуйну бувсса къатлуву. Шиву цукунчIавсса сантру дакъар. Мюрщисса оьрчIру бяхълай бур. Жуйвасса бияла бур вайннал кулпатрал умуд гъагъан къабувну, ва захIматсса чIумал чIарав бацIаву. Мунин бувну, ЦIуссалакрал райондалий (Новостройрай) зузисса «Инсан» фондрал отделданул баян буллай бур Ушановхъал кулпатран къатри щаллу дуван кумагран арцу цачIун дуллай бушиву. Сбербанкрал карта: 5469 6000 3909 0659, дарзуну дуссар ва номердануцIун: 7(988)300-77- 50 (Хадижат Шейхахмедовна). Инстаграм: fondinsan_novolak_ novostroy