Лаккучу – UFC-лул чемпион
Лаккучу – UFC-лул чемпион
Октябрьданул 22-нний Абу-Дабилив хьусса UFC 280 турнирданий 30 шинавусса Аьрасатнал спортсмен, лаккучу Ислам МахIачев данди увккунни Бразилиянавасса Чарльз Оливейращал.
Оливейра щалагу дунияллийсса биюлтрал сияхIраву цIа дусса, ттинин чемпионнал мухIлулул заллуну ивкIсса спортсмен ур.
Турнир дайдишиннин хьхьичI спортрал саняткартал бия ва турнир Исламлун бигьасса къахьунтIиссар, хъинну нигьчIийсса, гужсса муттаэнащал хьуна акьин багьантIиссар тIий. Бия МахIачев Оливейращал къалаянтIиссар тIиссагу.
Амма Ислам ххув хьунни ччянива, кIилчинмур раундрай бугъ увайсса приемрал кумаграцIух. Ванал цала муттаэнан цичIав дувансса мажал къабуллунни.
UFC-лул 70-лла килорал кIушиврийсса хьхьичIунми лачIун-буккултрал кьюкьлуву уттинин МахIачев мукьилчинмур ххуттай уссия, утти тIурча ванал чемпионшиврул мухIлу ларсунни. Турнир къуртал хьуну махъ дуллусса интервьюраву Исламлул бувсунни цува хIадурну ушиву ванияр тихуннайгу UFC-лул цала хьхьичI ацIан увманащал ччалли уккан.
«Ва UFC мухIу ласуншиврул на щалва оьрму спортзалдануву гьан бувссар. Ва ласавриву хъунмасса кIану бувгьуссар аьпалухун лавгсса ттул тренер Аьбдулманап НурмахIаммадовлул», – увкунни ванал.
UFC-лул президент Дэйна Вайтлул бувсунни утти МахIачевлун гужсса муттаэ лякъин багьлай бушиву.
Ислам МахIачев Буршиял шяраватуссар. Ва ур Дагъусттаннал, Аьрасатнал, Европанал ва дунияллул самболул чемпион.
