ТIивтIунни цIусса мизит
ТIивтIунни цIусса мизит
Сентябрьданул 29-нний, МухIаммад Идавс ﷺ увсса мубараксса Рабиуль-авваль зуруй, КIундиннал шяраву тIивтIунни цIуну бувсса ххаллилсса мизит. Ва тIитIлатIисса шадлугърайн бувкIсса республикалул личIи-личIисса кIанттурдай ялапар хъанахъисса хъамаллуравух бия Муфтиятрал вакил АьлиасхIаб Разакьов, райондалул имам ХIабиб Баталов, Лакрал райондалул администрациялул бакIчи Юсуп МахIаммадов, Заннал къатта баврицIун дархIусса харж-хурж щаллуну цайнна ларсъсса уссурвал Исмяил, Муслим ва Арам Маммаевхъул, МахIачкъала шагьрулул военком Геннадий Кьурбанов, КIундиннал шяраваллил бакIчи МахIаммад МахIмудов ва чIявусса цаймигу.
Лахълахъисса цалва мукъуву Юсуп МахIаммадовлул шяраваллил жяматрахь ва бувкIсса хъамаллурахь барча кунни мубараксса Рабиуль-авваль барзгу, цIуну тIивтIусса мизитгу.
– Ххарира укунсса шадлугъравух навагу гьуртту хъанахъаврия. Умуд бур мизитрая рувхIанийшиврул, шяраву ва райондалий Исламрал хIакьсса кIулшивуртту ппив шаврил дякюру, инсантал цачIун баврил, лагма лаган баврил вирдакI хьунссар тIисса. Барчаллагь ва бусравсса даву дурсса уссурвал Маммаевхъан, ва давривух гьурттушинна дурсса махъсса шяраваллил цинявппагу инсантуран. Ва бувсса хъунмасса захIматри, жулва халкьуннал рувхIанийсса ирсирал хазналуву бивхьусса хъунмасса бутIар, – увкунни Юсуп ХIамидовичлул.
Мизит бувсса уссурвавравасса хъунама Исмяил Маммаевлун дуллунни «Лакрал райондалул бусравсса гражданин» тIисса цIа. Муслим ва Арам Маммаевхъан буллунни Лакрал райондалул администрациялул чулухасса Барчаллагьрал чагъарду. «Лакрал райондалул бусравсса гражданин» тIисса цIа дуллунни Геннадий Кьурбановлунгу.
– Ххарину буру Аллагьнал ﷻ жунма буллусса маэшатрал бутIа Аллагьнал ﷻ ххуллий ишла буван бюхъаврия. Хъинну ччива ва мизитравун заназими ялу-ялун гьарза хъанай. Жула лакрал агьалинал дянив чIяву хъанай бур диндалул тIайласса ххуллийх наними. Умуд бур ва мизит савав хьуну имангу, шяраваллил инсантурал дянивсса арардугу цIакь хьунссар, жямат цачIун хьунссар, ца хьунссар тIисса, – тIий ур уссурвавравасса дянивма Муслим.
Мизитрал къатрал проектралссагу уссурваврал цалва бувну бур, шяраваллил инсантуращалгу маслихIат ккаклай, цимилгу дахханагу дурну, я мизитрал тих-шихсса чIаххуврахун бахкъачин, я хьхьичIухсса ххуллийн букъаккан. ЦIумур мизитрансса къатри гьарта-гьарзану дуван бюхъаншиврул, Аллагьнал ﷻ ххуллий ва жяматрал цIаний цала буттал къатри дуллусса, цал КIундиннал «Дагъусттан» колхозрал, яла СПК-рал председательну ивкIсса ХIажи Мирзаевлуйн хъунмасса барчаллагьрай бур уссурвал Маммаевхъулгу, шяраваллил администрациялул бакIчи МахIаммад МахIмудовгу, щарнил жяматгу.
Зунттал округрайсса Муфтиятрал вакил АьлиасхIаб Разакьовлул КIундиннал ва щалва райондалул жямат барчагу бувну, цачIуншиврул агьамшиврун хас бувсса насихIат бувсуна. Аьлимчунал дакIнин бувтуна бусурман ца кулпат кунма бикIан аьркиншиву, цанчирча Кьуръандалуву «Циняв бусурман уссурвалли» увкуну бунутIий.
Ва кьини уссурвал Маммаевхъангу, ХIажи Мирзаевлунгу бия Дагъусттан Республикалул Муфтиятрал чулухасса, Лакрал райондалул имам ХIабиб Батталовлул къулбасралусса Барчаллагьрал чагъарду.
МахIаммад МахIмудов барчаллагьрай ур мизит тIитIлатIисса шадлугъ дуллалисса сентябрьданул 29-мур кьини дучIаннин хьхьичI сайки нюжмардул мутталий шяраву дуллай бивкIсса давурттавух хьхьичIунну гьуртту хьусса шяраваллил администрациялул ва Культуралул къатрал зузалтрайн, шяраваллил жагьилтурайн, мукунма социал зузалтрайн, ва давриву цащава шайсса чIиви-хъунсса бутIа бивхьусса гьарцагу инсаннайн, шяраваллил кIичIиртту чанна лахъан баншиврул, дух хьумур даххана дуван, дакъаний цIуну дишин, аьркинмур ларсъсса ХIажи Абачараевлуйн.
Мяйжаннугу, мизит тIитIла-тIисса шадлугърайн хIадур хъанай, шяраву сайки нюжмардий, уртту ххартI дуллай, гьайкаллу марцI дуллай, ххуллурду бакьин буллай, зий бивкIссар шяраваллил инсантал. ВицIхъату, аьраххуллия, шяравун нанисса ххуллу бакьин бавриву кабакьу бувссар шяраваллил фондрал.
Ва ххаллилсса давриясса чичру щаллу дуллай, ца-кIива хха уссурвал Маммаевхъая ттигу чичин ччива. Цивппа, яруссаннал дяниву, Казбековский райондалий хъуни хьуну бунугу, вайннал дакIруми мудангу кIункIу тIий диркIун дур буттал шяравун, КIундив. ХьхьичIва вай нажагь бучIайсса бивкIун бур Лаккуйн. Уссурваврал, цивппа хъуни бувсса, лайкьну тарбия бувсса ниттин ПатIиматлун цIа куну, 2014 шинал КIундив дурну ххаллилсса къатри, пишкаш дурну дур ниттин. 2000-ку шиная шийнмай вай ялапар хъанай бур Хасавюрт шагьрулий, багьну бур аьмсса бизнесрахун, хъатлия хъатлийн дутлай, учирчагу, гъалатI къахьунссар, буруглай бур ниттихгу. Гьарца сант хьусса чIумал букIлай бур буттал шяравунгу, хьхьичIунну гьуртту хъанай бур шяраву дуллалисса давурттавухгу.
Ца-кIива махъ бухмур мизитраягу, къакIулнан уттинин ва шяраву мизит бувагу къабивкIсса кунма къабувчIин. Мизит мудангу бивкIссар. Амма, цаппарасса кIанттурду хIисаврайн лавсун, цIусса ва гьарта-гьарзасса мизит бувансса чарабакъашивугу диркIссар.
