Бугъ’ятуль сааьлук – Пакьирнал мурад
(дайдихьу хьхьичIми номердай)
Утти ми кьабитанну, аьркинмур гъалгъа банну,
Аьркин бакъами буслай чIунну аьдада гьайссар.
Муриднал дакI заэвссар, дакI цанний къадацIайссар,
Чансса асарданулгу хъинну зия увайссар.
ХIакьсса муридну хьурча, истикьамат хIакь хьурча,
Завкьийсса сиррулулгу хъунмасса асар байссар.
ДакI ва маз бакьин бува, маз кIикъянтта мабара,
Зумату буккай калам бувцуну буккан бува.
Рирщуну гъаргъсса куна бакI хьхьичIун дуртун икIу,
ЧIу бюхттул мабувара, гьавамур лещан бува.
Щейхнал чIарав мажлисрай чищал калам мабара,
Мунах вичIи дирхьуну барачат тIалаб дува.
МуначIа хъярч мабара, хъяхъавугу мадара,
Мунал калам жавгьарди, истимаъ хъинну бува.
Тасаввуфрал мажлисрай дакI тIайлану алуцIу,
Минная бавсса калам пайдану ккалли бува.
Инсан кусса цума ца «маданиюн битIабъэ»,
Оьминная арх увцун, хъинми гьалмахтал бува.
ЧIарав щяикIайминнал хасият ласайссарча,
Фукьараътал гъан бува, суфийтал ччимий бува.
Мяъсиятравун агьну вина цучIав ккаккарча,
Бюхъайкун му кьюлтI бува, ххуймунин кIункIу ува.
Инсан мяъсум акъари хатIалия уруччин,
Зал Гъафуру РахIимри, тавбалий гьуз учин а.
Закат-фитIрулуяту уруччин хIарачат ба,
ХIалалшиву хIакь хьурча, гьадият кьамул бува.
ХIирс, тIамъ, хиссат дуккан да, кьанааьтрай аьдат хьу,
Дунияллул цIинцIая вила чурх машгъул бува.
ХIасаб-насаб кьадити, хъус-риясат кьадити,
Пахру-хиял кьабивтун, сафа хьун ният дува.
Кибру-хIасад дуккан да, гъибат-бугьтан кьабити,
Фискьу-хиянатрая уккан хIарачат бува.
ХIилла, щялмахъ кьабити, рияъ-сумъят арх дува,
Бухлу, шухлу, намимат чурххаяту арх дува,
Ккавкнахьхун салам була, буллуналссагу ласи,
Аьдату-ссадатирттай чурх мураваза бува.
Чил щейхначIан гьан байсса ссаламру маласласар,
Мунава бувк каламрайн цичIав инкар мабара.
ЧIюн канил мабугьара, яругу малакьара,
Мунан чIалачIи кIанттай суннатругу мабара.
Оьккимургу ххуй бува, ххуймургу ххира бува,
Балики амру барча, журъатрай барт бигьара.
Ва кIанттай бувсса калам тафсилданин хIажатри,
Гьарица чувнал ванил сирру дуруччин захIматри.
Тафсилданий буслангу ва мунил кIану бакъар,
Ва мухтасардануву бусангу лайкь бакъассар.
Калам чIяву буварду, цаннил ца ккуччу буллай,
ХIакьмур тIалав дай уссу, пикри бан ялувссари.
Ва куццуйсса щейхнайну вил насаб хIасул хьурча,
Ява личIи машара, му хъунмасса бутIари.
Вила хъусгу кьинигу, вила дакIгу чIуннугу,
Циняв микку пана да, му багьагу чанссари.
«Куну мааь ссадикьин» кусса Заннал мунийнни,
Идавсилгу хIадис бур, аьмал буван ялувссар.
Цала кьавмдалувсса щейх умматрал идавс кунар,
Инава хIисав дува ци адаб аьркинссарив.
Вил аввалмур игьтимам фарз адаъ бавривури,
Баччибакъул къадурну камил бан аьркинссари.
КIилчин хъунмур игьтимам – важибатру барт бигьин,
Ми кунма суннатругу буруччин хIажатссари.
ЧIявучил шаъну бури суннатру камил буллай,
Фаризамур кьабитлай. Му кьабити – гьавари.
Му щяйтIаннул макрури инава аччан ансса,
Ява мунин чантI уку, махIрумну личIайссара.
Вай камил хьуну махъри тIарикьа тIалаб дайсса,
Утти дур ижтигьадрай рухI дулун ялувссари.
ТIурукь личIисса кунма, машрабругу личIиссар,
Саликталгу личIири, хIакъирал ххуллу цари.
Ми хилиф шайссавагу салик хилиф шаврийнур,
РавхIанийнал кьуватрай зуъфирай наниссари.
Миннан хIасул шайссари личIисса маватIинну,
Жува ми кутIа банну, аьркинмур личIиссари.
ХIакьнан хидмат вин ччарча, мунийну унсгу ччарча,
Аьркинни цал дакI марцI дан, яла бюхъантIиссари.
Вил дакIниву буссаксса Аллагьнащалсса гъират,
Аллагь Цува Гъаюрди, кьамул къахьунтIиссари.
Вил дакI ссаву дуссарив, ина му задрал лагъра,
Ина дурсса тIааьтгу мунийн хIисав шайссари.
Мунихлуну аьркинни халкьуннаяту оьзлат,
Миннаяту халватрал дакIгу халват шайссари.
Халкьуннаяту оьзлат – халкь дакIния буккавур,
Суратру оьзлат шаврил мурад къабулайссари.
Мурадрал хъунмур мури – халкь вин хъама битавур,
Халикь акъасса цамур дакIниву къадитавур.
Вил дакI цуксса арх хьурив халкьуннал кьункьаяту,
Му арх шаврин лавхьхьуну ЗанначIан гъан шайссари.
Ми пасадсса хияллу дакIния бувккуну махъ,
«Аллагь» тIисса зикрулий абад хьун аьркинссари.
Сулукрал бакI – аьмалли, мунил бакIгу вараъри,
Зугьдгу кьацIул дургьуну, таваккул аьркинссари.
Ва таваккулданунни даражартту бухьусса,
Цаннияр ца лавайссар. Караматру дуссари.
Аввалмур даражалул мукьра карамат дуссар:
Лухччи кIункIу дуваву, щинал ялтту ачайссар,
Гьава ахтиракь бавур, кавндалия дукавур,
Мунал ялун ххи шайсса кушуфатру дуссари.
ХIакьикьат ванийн чайссар, ва бабран лавхьхьуминнув,
Таракъи ва таназзул шикку хIасул шайссари.
Ванияр мукьахри вин макьаматру кIул шайсса,
Караматру, ахIваллу татавали шайссари.
Вила шартIру барт ларгун, халват буван вин ччарча,
Вила чурххал макьамру кIул шаву аьркинссари.
Вил вагьмулулсса султIан хIалдануяр ххув хьурча,
Халватрайн кьаст дувансса вин ххуллу бакъассари.
