Мубараксса зурул мажлис

МухIаммад Идавс ﷺ дунияллийн увксса Рабиуль-авваль зурун хас бувсса мажлисру бувай Дагъусттаннал гьарца шяраву, шагьрулий. КIицI лавгсса барз байбивхьусса гьантрай мукунсса шадлугъ хьуна ЦIуминалийсса ЦIуссалакрал шяраваллил мизитрал хIаятраву.

Мажлисраву гьуртту хьуна лакрал шяраваллал жяматру, имамтал, райондалул администрациялул вакилтал.

Аьдатрайн бувну, мажлис байбивхьуна мубараксса Кьуръандалул аятру буккаврия. Хъирив дурккуна мавлудру, нашидру, МухIаммад Идавсин ﷺ хас дурсса назмурду, бувсуна насихIатру, лавхъуна махъру, ккаккан дуруна ЦIуссалакрал шяраву буллалисса рувхIанийсса центрданун ва мадрасалун хас дурсса видеороликру. Мизитрал хъювун бавтIсса мюрщи оьрчIал дянив бувуна конкурсру: диндалул суаллахьхьун жаваб дуллуминнан ва Идавсихасса ﷺ назмурду дурккуминнан дуллуна бахшишру. Буттахъал макьандалий лакку мазрайсса зикрилул назму дурккуна Тюхчардал имам АьбдурахIман Нажвадиновлул.

Новостройрал имам Аьбдуллагь МухIаммадовлул мажлисрайн бувкIмий Рабиуль-авваль зурущал барчагу бувну, бувсуна мадрасартту бавриву ва миннуха лавхьхьусса иширттаву кабакьаву даврил ххирашивруя.

ЦIуссалакрал райондалул администрациялул зузала Акаев МахIачлул бавтIми барча бувуна райондалул бакIчи МаматIи ХIамзатовлул чулуха. Ванал кIицI лавгуна кутIасса мутталий мадраса щаллу бувну зузи бувансса умуд.

Диндалул дурккучу Хаваев Мансурдул чIурчIав дуруна ялун нанисса ник духIиндалий тарбия даврил агьамшиврий. «Жула буржри оьрчIру диндалул тарбия дуллай хъуни баву. Акъахьурча, гайннал къавкъинсса тIуллу дурсса чIумал бунагь ва жаваблувшиву нитти-буттай дикIантIиссар, лахьхьин къабувнутIий. Мунияту, ва шикку буллалисса рувхIанийсса центр, ва мадраса – жула миллат чантI учин бувансса сававри. Мизитру ва мадрасартту – марцIсса щаращиври: инсан гикку увкIун марцIсса щин къахIарчIуссаксса цува марцI къашайссар. Дин къаласайссар мичча-тичча, цурив къакIулсса интернетраву жавабру дуллалисса инсанная, дин лахьхьин аьркинссар жуна кIулсса мизитрал имамная, мадрасалул муаьлимная. Мунин бувну, циняв хIала бувххун, чIарав бавцIуну ва даву щаллу дуван багьлай бур. Инсантурал дянивсса ахIвад-хIал Аллагьу Тааьланал баххана къабувайссар, гай цивппа хIарачат буллай къабайбивхьуссаксса. Жува чансса хьхьичIунмай бачирча, Заннал хъиннува кумаг бантIиссар», - увкуна ванал.

Жяматрал чулуха бавтIми барча бувуна ЦIуссалакрал шяраваллил вакил Мирзоев Зайнуллагьлул.

Мажлисрайн цачIун хьуминнал дянив кIунтти бувккун пишкаш дуруна Оьмра-ХIаж бувансса путевка.

Мажлисрал ахирданий циняв бусурманнаха дуаьгу дурну, хIадур бувсса дукралул цадакьа кьамул бувуна.

И. Оьмаров