Муфтий хьунаавкьунни СМИ-лул вакилтуращал
Муфтий хьунаавкьунни СМИ-лул вакилтуращал
Дагъусттаннал Муфтиятрал конференц-залданувун цачIун хьуну бия жура-журасса СМИ-лул зузалт, щейх АхIмад-афандинащал хьунабакьин.
«Ас-салам» кказитрал, Ислам.ру ва Исламдаг.ру сайтирдал, «ННТ» телеканалданул ва «Ватан» радиолул редактортурал ва зузалтрал бувсуна 2023-ку шинал цала дурсса давурттая ва гьашину дуван пикри бумуния.
Журналистурахь насихIат буслай Муфтийнал увкуна: «Лахьхьусса кьини ларгунни, зана дитан къахьунссар, гьунттийгу жула бакIрачIан ци бучIавив къакIулссар. Жула кIунттихь дур так хIакьинусса кьини, мунияту гьарца лахIзалува шайссаксса гьарзасса пайда ласун аьркинссар».
«Ас-саламрал» хъунама редактор ХIасан МахIмудовлул бувсуна оьрус мазрайсса кказит гьашину кIибавчIуну, Дагъустаннансса ва республикалул кьатIувминнасса кказитру бувшиву. ДакIнин бувтуна хIакьинусса кьини 13 мазрай ита бакьайшиву ва уттигу ххи бансса пикри бушиву. ХIакьинусса кьини кказитрал аьмсса тираж 200 азаруннийн бивсса бур.
«Ватан» радиолул 16 шинал мутталий инсантурачIан диян дуллалисса диндалул нур. Интернетрал кумаграйну «Ватандалух» вичIи дишин шайссар щала дунияллий.
Муфтиятрал прессалул къуллугърал бусайссар республикалий хъанахъисса диндалул иширттая, мажлисирттая ва Муфтиятрайн хъар бивщусса идарартал давурттая.
Сезон дайдирхьуну дур ННТ каналданул: цIусса жура-журасса передачарду, аналитика ва сайки кино ласавугу.
Муфтиятрал дачин дурсса сайтру зий дур 2005-ку шиная мукьах. Шиная шинайн ххуй хъанай, вайннувун буххаймигу чIяву хъанай.
Мажлисрал ахирданий цаппара журналистуран буллуна барчаллагьрал чагъарду ва пишкаш дуруна дакIний личIансса бахшишру.
