Дуаь дан цачIун хьунни
Дуаь дан цачIун хьунни
Ноябрьданул 12-нний гьан-ттайнмай Новостройрайсса ЦIуссалакрал шяраву хьунни Палестиннал бусурманнаха дуаь даврин ва «Ас-салам» кказитран хас бувсса мажлис.
Мажлисрайн цачIун хьуна чIявусса инсантал. Новостройрал шяраваллава бакъасса, цайми щархъавагу бувкIун бия диндалул мажлисрая барачат биян.
Мажлис бачин бувну ия «Аманат-Холдинграл» каялувчи АхIмад ХIасанханов. Кьуръандалул аятру ва мавлудру дурккуна Аьбдулжилов Шамиллул.
БавтIминнал хьхьичIун махъ лахъан увккуна «Ас-саламрал» хъунама редакторнал кумагчи Аьдил Ибрагьимов. Ванал бувсуна кказит чичин ва машан ласун харж дурсса гьарца къуруш Ислам машгьур даврил ххуллийн най душиву. ДакIнин бувтуна дин халкьунначIан диян даву – гьарца бусурманчунал бурж бушиву: «"Ас-салам" кказитрайхчIин щала Аьрасатнал хIукуматрайх ппив хъанай дуссар дин. Му кказит чивчумагу – дин машгьур давриву гьурттушин дуллалимари. Кьиямасса кьини жухьва цIуххирча, Ислам хьхьичIуннай дачин дан ина цукунсса захIмат бивхьуссия куну, жущава бусан хьунтIиссар цамур цичIав хъуннасса дуван къабювхъухьурчагу, диндалул кказит чивчуссия учин. ХIакьину циняв мазурдийсса «Ас-саламрал» тираж бур 200 азаруннияр ххисса, миннувату дахьва мукьва бутIул ца бутIа Дагъусттаннай буссар, гайми тIурча жула хIукуматрал цайми регионнай. Жува кказит чичин харж дурсса арцу наниссар тийх "Ас-саламраха" зузисса инсантал аьркинмунил дузал буваншиврул» – увкуна Аь. Ибрагьимовлул.
Хъирив махъ лавхъуна ЦIуссалакрал райондалул бакIчинал хъиривчу Амир Султановлул: «Щала дунияллул къулагъас хIакьину дур Палестиннаву хъанахъимунийн тIайла дурну. Палестиннал ва Израильнал дянивсса къалмакъалданул къизгъиншиврул щалва бусурман уммат бур тикку хъанахъимунил пикрирдай. Циняв бусурман бур хьхьуниву шания бизлай, Заннайн дуаьртту дуллай, зулмулухун багьсса халкь ххассал бува тIий. Жула республикалий Палестиннан кумагран цачIун дурну дур 90 миллиондалия ххисса арцу. Нагу зухь миннат буллай ура, тайннаха дуаьртту дуллали тIий».
ЦIуссалакрал райондалиясса дуклаки оьрчIал дурккуна хъинну дюххансса Палестиннал инсантурахасса назмурду.
Караман шяраваллил имам МухIаммадрасул Аьшикьовлул вяъзалуву бувсуна бусурманнал цалва ялувсса хъунаманал: имамнал, муфтийнал увкумур буллан аьркиншиву: «ЦIана захIматсса чIун дур, хъиннура захIматгу хьунссар. Укунсса чIумал буван аьркинмургу жухьва Идавсил ﷺ бувсун бур. Тийх-шийх щябивкIун жунма оьрму бутлан лахьхьин буллалиминнах вичIи дихьлан аьркин бакъассар. Жула чIаравсса, жува ккашилни цивппагу ккашил хьунтIисса, жуйнма бомба багьарча гайннайнгу багьансса, чунчIав ливхъун къалавгсса аьлимтурахру жува вичIи дихьлан аьркинсса. Аллагьнал кумаг баннав!»
Новостройрал имам Хаваев Мансурдул барчаллагь увкуна «Ас-салам» кказитрал зузалтрахь ва му чичин ва биян буван кумаг буллалиминнахь. Ванал дакIнин бувтуна жунма мудан тавба дуллан аьркиншиву: «Жува хIакьину буру бунагьирттавун бахьлавгун. Мунияту, Аллагьнал жула дуаьртту кьамул къадуллалиссар. Бунагьирттая арх бувцуну, гай баврия пашман хьуну, марцIну тавба дуварча, жула ишру хьхьичIунмай бачинтIиссар», – увкуна имамнал.
Новостройрай ялунчIинсса шинайн «Ас-салам» чивчуминнал дянив кIунтти бувккун пишкаш дуруна чIивимур ХIаж (Оьмра) бансса путевкартту. Ми дурххуна Муртузалиев Сагидлул ва МахIаммадова Хадижатлул.
Мажлисрал ахирданий циняв бавтIминнал «амин» тIий ЦIуссаккуллал имам ЩейхахIмад Мажидовлул Палестиннал бусурманнаха дуаь дуруна.
