Ккалаккияра луттирду!
Жула оьрмулул гьарица арардаву луттирду буккаврия хъунмасса кумаг буссар. Щак бакъа ва исват хьусса затри. Так луттирду буккайсса инсанни багьайкунсса кIулшивуртту дусса икIайсса. Луттирду буккаврихсса гъирарал жунма кумаг буллалиссар школалийгу, гихунмайсса оьрмулувугу хьхьичIунну ва итххявххуну бикIан.
Луттирду буккаврийхчIин жунма лагма-ялттусса оьрмулуву хъанахъимур кIул хъанай бур. Ми буккаврия инсаннан хъуннасса дигьалагру ва дялахъру хъанахъиссар. Луттирдал инсан тарбия уллалиссар, цала чулухунай акъассагу цайминнал чулухунайгу аякьа-дакI цIимилийну икIан. Зула оьрчIан оьрмулуву дурсса ца яла ххаллилмур бахшишну хъанахъиссар, миннавун луттирду буккаврихсса ччаву рутаву. Ялавай кIицI лаганну оьрчIан луттирду буккаву ххира хьунсса цаппара маслихIатру. Ччя-ччяни оьрчIахь вичIи дишин гъира багьансса куццуйсса луттирду пасихIну ккалаккияра. БучIиссар, луттирду буккаву кулпатраву дуваайсса ца агьамсса аьдат хIисаврай, цинярдагу гаджетругу лерщуну, пахъ багьну оьрчIахь луттирду ккалаккисса нитти-буттах вичIи дихьлан.
ХIарачат бувара оьрчIахь личIиличIисса журардал – диндалул, классикалул, тарихрал ва цаймигу журардал луттирду ккалан. Хъама мабитару оьрчIру рувхIанийну итххяххан бувангу. Буккияра оьрчIахь Исламрал вирттаврал гьунардая ва миннал инсаншиврия, чувшиврия. Мукунсса вирттаврал тарихрая баяйхту, вихшияра, оьрчIал супервирттал Халк ва Муххал Инсан вирттавран ккалли къабуллантIиссар! Ккалаккияра зула оьрчIру мюрщину бунува, шанаши бувайни бакъассагу, дяхтта бялахъан бувайнигу.
ОьрчIансса цалчинсса игрушкалун кIанай машан ласияра янналия бувсса луттирду. ХIасул дувара оьрчIащал луттирдал зумувну ихтилатру буллалисса ва ми ххира буллалисса кулптаравусса аьдатру. Зувару оьрчIан эбратну хъанахъисса. Ххуйсса эбратну хьунтIиссар ччя-ччяни луттирду ккалаккисса нину-ппу. Шаппа, ичIува зу ккалаккисса луттирдавух бикIан аьркинссар дукра дувайсса рецептру дусса луттирду, журналлу, кказитру, романну ва сайр бавриясса ва кIулшивурттал даража гьаз бавриясса личIи-личIисса луттирду. Бусласияра оьрчIахь зува бувккусса луттирдая. Хаснува, кулпат супралухун бавтIусса чIумал бусласияра мукунсса хаварду. Бусияра миннахь зунма асар хьумуния, бюхъайссар миннангу мукунсса луттирду буккаврихсса гъира багьан.
Сакин бувара «Кулпатрал луттирдал клуб». Школалий дуклакисса оьрчIал цумур бунугу ца произведение лахьлахьинигу, цанни къабучIисса муния щала кулпатрал дянив ккалаккисса тема дуван? Мунийну оьрчIан му тема хъиннура куртIну лахьхьинсса кумаг хъанахъиссар.
Яла ххаллилмур бахшиш
Зура дуллалисса бахшиширттащал пишкаш бувара зулва дустуран, гъанминнан луттирдугу. ОьрчIал ххюварду лавсун, ягу ххуйсса тIуллу дурсса чIумалгу пишкаш бувара миннан тамашасса ва ххуй-ххуйсса луттирду. Му куццуй зу оьрчIал дуллалимунин кьимат бищаву ва ми ххари баву бакъассагу, оьрчIру ас-намус буну тарбия буллалиссару. Заназияра оьрчIащал библиотекардавун. Ккаккан бувара библиотекалувусса луттирдал илгьам, лахьхьин бувара миннан цукун къуццу тIун аьркинссарив, бувчIин бувара луттирдаха буллалисса хIурмат – му аькьлу бусса инсантураха буллалисса хIурмат бушиву.
Ялагу, кулпатраву дуван маслихIат бавияв мукунна ххаллилсса аьдат «Кулпатравусса библиотекалул кьини» тIисса. Луттирду буккаврин хас дурсса кьини бизарсса къахьуншиврул ччянира хIадур дуван бучIиссар оьрчIан ххирасса нахIу-нацIурду. Мяйжаннугу, оьрчIан кулпатраву мукун луттирду ккалай бивкIсса дарсру тIачIав дакIния къадуккантIиссар.
АМИНАТ ЕВПАТОВА
