Халкьуннан мюнпатсса даву

Халкьуннан мюнпатсса даву

«Инсан» фондрал Дагъусттаннайгу, щалагу хIукуматрайгу кумаг бувай захIматшиврувун багьминнан, миски-гъаривнан, ятинтуран ва цайминнангу. Фондрал филиаллу зий бур жула республикалийсса циняв районнай ва шагьрурдай. Жул ихтилат хьунни Ккуллал райондалийсса филиалданул каялувчи Исмяилов Макьсудлущал.

Лаккуйн учIаннин Макьсуд ххюра шинай зий ивкIун ур ТляратIиял райондалийсса «Инсандалул» хъунаману. 2023 шинал октябрь зуруй Ккуллал райондалул имам МухIаммад-Маннар Бариевлул тIалавшиннарайну ва гьан увну ур Лакку билаятрайн. ДачIи шинал мутталий дуван бювхъусса давурттаясса цIухху-бусулул хIасил дуссар ва макьалалуву.

Цамур миллатрал инсан унугу, Макьсуд хъинну хIала увххун, чялишну зий ур, Ккуллал райондалул жяматран мюнпатмур буллай.

КутIасса мутталий райондалдий сакин дурну дур «Инсан» фондрал команда. Исмяилов Макьсудлул хъиривчуну ур Рамазанов Салман, райондалийсса кумагчи – Рената ХIайдарова, МахIачкъалаливсса кумагчи Диана Аьлиева, Ккуллал шяравусса вакил АхIмадова Шуъбанат, МахIачкъалаливсса вакил МахIаммадова Кисаран.

Макьсудлул дачин дурну дур азаллийсса инсантал хъирив бавцIусса фондрал соцсетьру. Шиву дихьлай дур дуллалисса давурттаясса отчетру. Сакин бувну бур арамтуннансса ва хъаннинсса Вацапрал группарду, гьарца нюжмар хьхьуну «Инсан» фондран кумагран арцу цачIун дуван кумаг буллансса.

Кафердаву, ттучаннаву бивхьуну бур цадакьа бичинсса къуршив. Зуруй цал гай тIивтIуну, цачIун хьусса арцу диян дувайсса дур мюхтажминначIан ягу дукия-хIачIия машан ларсун дачIайсса дур.

КьюлтIну цадакьа буван гъира буминнан му иш щаллу буван бюхълай «автоплатеж» ишла дурну, телефондалувухчIин фондравун арцу гьан дуван сант дур.

Даврийн увкIния шинай Макьсуд Исмяилов ивну ур 100-ния ливчусса къушливун: къашайшатрачIан, ятинтурачIан, СВО-луву гьуртту хъанахъиминнал кулпатирттавун, бугьара-минначIан. Гайннан дуллуну дур дуки-хIачIия, янна ва м.ц.

Му бакъассагу, райондалийсса шяраваллавух увккун, инспекциялул актру дуцIин дурну, мюхтажшиву дусса кулпатру кIул бувну, фондрал сияхIравун лавсун бур.

«Инсан» фонд бур хIукуматрал идарарттащал хIала-гьурттуну зий: ЦСОН, МЧС, МФЦ, Россети ва цаймигу.

Щаллу дуван бювхъусса хъунисса давурттая тIурча, Хъусращатусса Шихановхъал кулпатран бухсса къатри цIудуккан дуван цачIун дурну дуллуну дур 205 000 къуруш. Къатри ччурччуну ливчIсса Ккулатусса Аьлиевхъал кулпатран дартIун дур 273 000 къуруш. Ваччатусса Мусаева Иринал къатри цIудуккан даншиврул цачIун дан бювхъуну бур 600 000 къуруш, цIусса къатри дуллай байбивхьуну бур.

Макьсудлул хIарачатрайну Ваччав тIивтIуну бур «Инсан» фондрал сияхIравуминнан кумагрансса ттучан (бутик). СияхIравусса инсантураща бюхълай бур ттучандалува укра янна-ус ласун.

ЧIяйннал школалул директор ХIажиева Альбинал кумаграйну Зумаритавал байрандалул гьантрай «ЦIусса дустал» тIисса акция дурну, къашавайсса, кьатIуппай буккан къабюхълахъисса оьрчIан нацIу-кьацIулул бахшишру пишкаш дурну дур.

Макьсудлул бусаврин бувну, ванияр тихунмайгу бюхъаймур буллай зунсса кьаст дур тIар, цайнна тапшур дурсса даву бакIрайн дуккан даншиврул.