Хъинсса хасият – диндалул аслу
Хъинсса хасият думанан муния хайр бияйссар дунияллий ва ахиратраву, муния бувсун бур хIадисраву. Ца чIумал Аьббаслул Идавсихь ﷺ цIувххуссар: «Я Расулуллагь, вий аякьа дуллай ивкIунтIий АбутIалиблун ахиратраву мюнпат биянтIиссарив?» «БиянтIиссар, ттуй аякьа къадурссания, га утантIиссия дужжагьрал чIанулун». Цамур хIадисраву бувсун бур гьарца итни кьини Абулагьаблул хъункIиссурава щин дуккайшиву. Мунил багьанагу – МухIаммад ﷺ ниттил увсса чIумал Абулагьаб ххари хьуну, цала лагъсса душ тархъан бувссар.
СалихIминнавасса цаннал увкуну бур: «МухIаммад Идавс ﷺ ккаккан къабювхъуну, амма дакIниву гужсса гъира бума Кьуръандалух уругуча. Цанчирча, Кьуръандалух бивтсса янилгу ххирасса Идавсих ﷺ бурувгсса янилгу дянив цукунчIавсса личIишиву дакъассар. Кьуръан лавхьхьуссар тIитIин дурсса инсаннал ﷺ суратраха, му инсаннал цIагу – АьбдулмутIалиблул арснал Аьбдуллагьлул арс МухIаммад ﷺ.
Цаманал увкуну бур: «МухIаммадлух ﷺ ябитан ччима мунал Сунналул ххуллийх ачин аьркинссар, хаснува му хъамабитала хьусса кIанттурдаву. Цанчирча, Сунна уттава буккан баву лавхьхьуссар цува Идавс ﷺ уттава авриха. Идавсил ﷺ сунна уттава бувма лащан уван бучIиссар щалва инсаният уттава бувманаха, цанчирча, Идавснаву ﷺ диркIссар гьарзад хъинмур ва камилмур.
Ялагу ца салихIсса инсаннал увкуну бур: «Оьккисса тIул-тIабиаьтрая халкьуннан къакIулсса цичIав къаливчIссар, МухIаммад ﷺ щала дунияллийсса инсантурачIан идавсну гьан увну махъ, цанчирча, Идавсил ﷺ жунма балжину бувчIин бувссар ми тIабиаьтру дайдишайсса ххуллурду. Мунин бувну, инсаннал оьккисса тIул дуван цукунчIавсса багьана къаливчIссар, ххуймургу оьккимургу Идавсил ﷺ баян бувнутIий.
Диндалул аьлимтурал луттирдаву бувсун бур Аллагь Тааьланал Идавсихьхьун ﷺ дунияллийсса циняв неъматирттал хазнардал кIулли дуллушиву, амма Идавсил ﷺ ми кьамул къадурссар. Яла Заннал Миъражрал хьхьуну Идавс ﷺ ссавруннайн гьаз увну, циняв малаиктал ва Алжан ккаккан бувссар. Амма Идавсил ﷺ миннухгу къулагъас къадурссар. Яла Аллагьнал ﷺ увкуссар (мяъна): «Идавсил яру хIалалмуния къабувцуна, мунил дазурдава къабувккуна» («Ан-Наджм» суралул 17-мур аят). Идавс ﷺ тиху-шихунай къаурувгссар, муниятур Аллагьнал ﷻ увкусса: «Ина бюхттулсса тIабиатрал (хасиятрал) заллура». Ци бала биярчагу, ци неъматру булурчагу, Идавс ﷺ тIайласса ххуллия къааьйкьуссар.
Жунма кIулли Идавсин ﷺ циксса захIматшивуртту духIан багьссарив. Гьарца ишираву ссавур дувайсса диркIссар. БакIрайн щаву дирну, ккарччи гъаргъун унувагу «Аллагь, ттул миллат багъишла бити, тайннан цала дуллалимур къакIулссарча!», - тIий ивкIссар. Кьиямасса кьинигу, циняв идавстал цаласса буллалисса чIумал, МухIаммад Идавс ﷺ леххаву тIунтIиссар: «Ттул уммат, ттул уммат», - тIий.
