Барча хьуннав Рамазан барз!

Ас-саламу аьлайкум ва рахIматуллагьи ва баракатугь, ххирасса уссурвал ва ссурвал! ДакIнихтуну барча буллай ура зу циняв ялун нанисса мубараксса Рамазан зурущал. Ва барз – гьарцаманал цалва оьрмулия пикрирду бувайсса, дакIру марцI шайсса, цIими гьарзасса, Заннал неъматру чIявусса барзри.

Рамазан барз – Заннал неъматри, цанчирча, ва зуруйри Аллагьнал Калам, кьимат бищун къашайсса бахшиш, аьй лякъин къашайсса насихIат, хъинмунийн оьвтIисса ва оьмуния ххассал буллалисса Лу – Кьуръан ликкан бувсса.

Аллагь Тааьланайн дазу-зума дакъасса щукру ва барз уттигу цал хьуна бакьин нясив бувсса. Ва Рамазан барз лайкьну, ахиратрал оьрмулун мюнпатну гьан бувансса каши Заннал дулуннав!

Ва чаннасса зуруйри Алллагьнал ﷻ зума дугьаву жуйва фаризану бивхьусса. Зума дургьуминнан аьркинссар гьарца лайкь бакъамуния: оьккисса махъ учаврия, щялмахъ бусаврия, бугьтан-гъибатрая, аьркин бакъасса пикрирдая мюхчанну бикIан. КIункIу тIун аьркинссар так хъинмуничIан. Мунияту Рамазан – инсаннал чурх ва дакI марцI шайсса барзри.

Зула чIаравминнал хъирив мабацIларди, аьркин бакъасса ихтилатру мабулларди: мукъул диян дурсса щаву ччяни хъин къашайссар, гьарца мукъухлугу Аллагьнал ﷻ хьхьичI жаваб дулун багьантIиссар. Бунагьру багъишла битаврийн умуд бивхьуну, хъинбаларду буллай, зула эбратрайну чIаравминнаву узданшиву, инсаншиву ва ас-ламус чантI учинмур буллали. Зущава ка-кумаг буван бюхъайми хъама мабитари, мугу Заннал хьхьичIсса жула буржри. Бюхъайкун чIявуну буллали цадакьартту.

МухIаммад Идавсил ﷺ увкуссар: «Алжаннул буссар «Раян» тIисса цIа дусса ляличIисса къапу. Кьиямасса кьини мунивух буххантIиссар зума дугьлай бивкIми, цама цучIав къауххантIиссар. «Чу бур зумарду дугьлай бивкIми?» - куну, му къапулувух Алжаннавун буххан бантIиссар. Ми циняв буххайхту, къапурду лакьинтIиссар» (Бухари, Муслим).

Рамазан зурул даражартту хъинну чIявуссар, мунияту жула хIарачатгу мукунмасса бикIан аьркинссар.

ХIакьинусса кьини инсаниятрайн чIярусса захIматшивуртту дирну дур. Ми лайкьну духIан кумаг бувайссар цIакьсса имандалул ва Аллагьнайн ﷻ таваккал бутаврил. Аллагьнал ﷻ жунма Кьуръандалуву дакIнин бувтун бур (мяъна): «Гьарца захIматшиврул хъирив дучIантIиссар бигьашиву», – куну («ИнширахI» суралул 5-6 аятру).

Заннахь чIа тIий ура ва захIматсса заманнай жула дакIру цIакь даву, ссавур дулаву. Жуятува бала-апатIру, мусиватру ва азарду Аллагьнал ﷻ арх дуваннав, Яла хъинмур эбадат дуллай ва Рамазан барз гьан бансса каши дулуннав.

Хъинбалалул лишанну хьусса ва барз багьана хьуну жула дакIру паракьат хьуннав, рувхIанийсса марцIшиву дулуннав, гьарзасса хъиншивуртту дуван бюхъаннав!