Неъматрал барз
Ас-саламу аьлайкум ва рахIматуллагьи ва баракатугьу!
Ххирасса уссурвал ва ссурвал!
Щукру Аллагьнайн ﷻ, жунма ва мубараксса, бунагьру багъишла битайсса, неъматру ликкайсса Рамазан барз буллусса.
Рамазан – цумацагу бусурманчунан яла агьаммур, хIурмат лахъмур барзри. Ва бучIайхту жула дакIурдиву ляличIисса ххаришиву, шавкьирайсса шадшиву сукку шай, ва аьдад-ккал дакъасса, Заннан бакъа багьа къакIулсса неъматирттал вибувцIусса барз бушиву кIулну.
Щукру Заннайн, шиная шинайн дакIнихтуну зумарду дугьлагьими, хьхьурду эбадатрай гьан дуллалими чIяву хъанай бур. Аммарив бур дурагу къадугьлагьимигу. Миннан чара бакъа дакIнин бутан аьркинни Идавсил ﷺ увкумур: «Ца кьини зума дургьуманал ва дужжагьрал дяних Аллагьнал дувантIиссар аьрщарая ссавруннайн бияннинсса манзилдануксса кьакьа» (ТIабрани).
КIулну бикIияра, зума дургьуманан гьарца лахIзалух буссар ва дунияллий цамур ссахлучIав къабулайсса чири. Ва зуруй жува хIарачат бан аьркинссар хъинмур чулинмай дахханашин дуван, куннал куннай аякьа дуллан, кумаг аьркинминнах къулагъас гьарза дуван.
МухIаммад Идавсил ﷺ увкуссар: «Рамазан зуруй Заннайн иман ва хьул бивхьуну зумарду дугьлагьиманал бунагьру багъишла битантIиссар» (аль-Бухари, Муслим). Умуд бур жувагу Аллагьнал ﷻ багъишла бивтминнавух хьунссару, дургьусса зумарду кьамулну лякъинссар тIисса.
Барча буллай ура цинявппагу муъминтал ва барачатсса барз ялун бияврищал. ЧIа тIий ура бюхъайкун мюнпатну, лайкьну, Заннайн мютIину гьан буван, дачIра ларгсса царагу минутIрая хIайп тIун къабагьанширул.
