Барча хьуннав Рамазан барз!

Муфтий, аьлимтурал мажлисрал председатель шайх АхIмад-афандинал барча бувунни бусурман агьали Рамазан барз бучIаврищал

Ас-саламу аьлайкум ва рахIматуллагьи ва баракатугь! ХIурмат бусса уссурвал ва ссурвал, зу цинявппагу дакIнихтуну барча буллай ура Рамазан барз бучIаврищал. Ва хъанай дур личIинувасса хIарачатрай эбадат дувайсса, диндалиясса щугълурду чIяву шайсса, цIими гьарзану бувайсса чIун.

Махъсса шин захIматсса, кьурчIисса хьунни. Ттуршахъул жула гьалмахтурал, дустурал, гъан-маччаминнал оьрмурду азарданул лавсунни. Амма, Кьуръандалуву увкусса куццуй, гьарца захIматшиврул хъирив бигьашиву дучIайссар. Аллагьнал ﷻ цIимилийну тагьар чанчанну тIий ххуй хъанай дур. Аллагьнайн ﷻ щукру. ЧIявуми шагьрурдай ва шяраваллаву мизитру ва чак бувайсса къатри цIунил зузи буллай бур. Ххирасса уссурвал ва ссурвал, вай захIматшивурттах къабурувгун, муданна кунна Рамазан зурул жула ужагъру ва дакIру ххаришиврул дуцIин дуванссар, жула Ватандалий буллугъшиву ва барачатшиву гьарза хьунссар, куннал кунначIансса рахIму-цIими гуж хьунссар, дакIру кIукIлу дурну имандалул ва Заннайнсса таваккалданул дуцIинссар тIисса умуд бур. Рамазан – тавбалул ва тарбиялул, Заннайн мютIишиврул ва рязишиврул, ссавурданул ва хIалимшиврул, цIимилул ва ка-кумаграл, цачIуншиврул ва уссушиврул барзри. Зума дугьаврил жува рувхIанийсса камилшивручIан гъан бувантIиссару.

Рамазан – хъинбаларду, садакьарду буллай бястлий буккан аьркинсса барзри. Бувсса цадакьалул хъус чан къадувайссар, так чIяру дуварча дакъа. Мунияту, бачияра жуятува Аллагь ﷻ рязи хьуншиврул халкьуннал дакIру ххари дуллан хIарачат баннуча. Ва мубараксса зуруй дургьусса гьарца зума сававну жуйнма Заннал цIими ва барачатшиву ликканнав! Аллагьнал ﷻ жула зумарду, чирисса аьмаллу, таравихI-чакру кьамул баннав, дунияллий ва ахиратраву рахIатшиву, паракьатшиву нясив дуваннав! Вай ляличIисса гьантри ляличIисса эбадат дуллай гьан буван Заннал кабакьиннав, жула дуаьрду ва хъинсса аьмаллу лякъиннав дакI ва чурх оьмуния марцI хьунсса сававну! Амин.