Имамги гIолилавги
Мажгиталде вачIарав гIолилав ун вуго имамасда аскIове ва абун буго жинца гьанибе тIокIалъ хIетIе чIезе гьечIин абун. Имамас гIилла цIехедал, гIолилас абула: «Гьаниб гIадамал цоцазда нахъасан кIалъалел рагIана. Цо-цоял имамасул вагIзаялъухъги гIенеккичIого, телефоназде къулунцин рихьана, цогидалин абуни, Къуръан цIалулелъул цоцазда гаргадулел рукIана», - ян.
ГIолиласухъги гIенеккун, имамас гьесухъе кьун буго лъел цIураб стакан ва абун буго къатIра гIодобе тIинкIиларедухъ мажгиталда жаниб лъабго нухалда свери бахъеян абун. Гьес абухъе гьабидал, имамас гIолиласда цIехон буго гьаб нухалда телефоназде къуларалго рихьанищилан. РихьичIин жаваб кьун буго гIолилас.
- Рихьилищха мун лъел цIураб стаканалъул ургъалида вукIиндал, - ян абун буго имамас. – ТIолабго пикру БетIергьанасде буссиндал, нилъер заман букIунаро доре-гъоре балагьизе, чияр гъалатIалгун гIунгутIаби цIехезе.
ХIакъикъаталдаги Аллагьасул рокъор ругеб мехалда, гьалъул-долъул пикрабазда рукIиналъ, кIочона гьенире рачIиналъе букIараб аслияб гIилла. Гьединлъидал хIаракат бахъизе ккола гIибадаталде машгъуллъизе ва гьеб мехалда нилъеда рихьизе гьечIо лъилго гъалатIал ва гIунгутIаби.
Аллагьас тавпикъ кьеги мажгитазул адаб цIунизе.
