Аварагасул гIумруялдаса суалал

– Савралъул нохъода Аварагги Абубакарги чан къоялъ рукIарал?

Савралъул нохъода Аварагги Абубакарги лъабго къоялъ рукIана.

– Маккаялдаса хабар босун Аварагасухъеги АбубакарасхIабасухъеги нохъоде щив вачIун вукIарав?

Маккаялдаса хабар босун Аварагасухъеги Абубакар-асхIабасухъеги нохъоде вачIунаан Абубакарил вас ГIабдуллагь.

– Къубаалда Авараг гьоболлъун лъил рокъов рещтIарав?

Къубаалда Авараг гьоболлъун рещтIана аль-Гьадамил вас Кульсумил рокъов.

– Мадинаялда мажгит базе Аварагас ракь бичун лъихъа босараб?

Мадинаялда мажгит базе Аварагас ракь бичун босана Зураратил АсгIадил къайимлъиялда гъоркь рукIарал кIиго бесдаласухъа.

– Мадинаялда Авараг лъил рокъов чIарав?

Мадинаялда Авараг чIана АбуАюб аль-Ансариясул рокъов.

– Мадинаялда сверухъ хандакъ лъил малъиялда рекъон бухъараб?

Мадинаялда сверухъ хандакъ бухъана Салманул Фарисиясул пикруялда рекъон.

– Аварагасул имгIал ХIамзат щиб гъазаваталда шагьидлъарав?

Аварагасул имгIал ХIамзат шагьидлъана УхIуд гъазаваталда.

– Аварагасул руччабазул «мискинзабазул эбел» абун тIокIцIар лъие кьураб?

Аварагасул руччабазул «мискинзабазул эбел» абун тIокIцIар кьуна Хузайматил Зайнабие.

– Дунял толеб мехалъ Аварагасул чан хъахIаб рас букIараб?

Дунял толеб мехалъ Аварагасул букIана I7 хъахIаб рас.

– Авараг хабалъ лъица лъурав?

Авараг хабалъ лъуна АбуТIалибил ГIалица, ГIабасица ва гьесул кIиявго вас Фазлгун Къусамица.

– Аварагасул хабаде тIаде лъим лъица тIураб?

Аварагасул хабаде лъим тIуна Билал-асхIабас.

– Аварагасул ахирисей чIужу щий кколей?

Аварагасул ахирисей чIужу ккола ХIарисил яс Маймунат.

– Авараг хун хадув лъица чурарав?

Хун хадув Авараг чурана Абу-ТIалибил ГIалица, ГIабасица, гьесул кIиявго вас Фазлгун Къусамица ва гьединго Шукъраница, Зайдил вас Усаматица ва Хавлал вас Авсица.

– Авараг накълолъун хадуб, гьесул лъималазул нахъе щал хутIарал?

Авараг накълолъун хадуб гьесул лъималазул нахъе хутIана яс ПатIимат. .

– Чан сон букIараб Аварагасул накълолъараб мехалъ?

Авараг накълолъана 63 сон тIубайдал.

(«Нурул якъин», «Фазаилул ХIабиб», «Ар-РахIикъул махтум»).

ХIАБИБ МУХIАММАДОВ