ГъветIалъул мугIжизат

ГIали-асхIабас бицун буго жив аварагасда ﷺ цадахъ Макка шагьар бахун къватIиве унаанин. Жал мугIрузда ва гъутIбузда аскIосан унаго, гьез абулаанин: «Ассаламу гIалайка, я Расулаллагь», - абун.

Цоги мугIжизат буго, хирияв аварагас ﷺ ахIидал, гъветI гьесда аскIобе бачIиналъул хIакъалъулъги. Цо нухалъ хирияв авараг ﷺ пашманго вукIана. Маккаялъул гIадамаз кьабиялъ гьесул гьурмадаса бачIунеб биги букIана. Цинги ЖабрагIил малаикги вачIун, хириясда ﷺ гьикъула: «Щиб дуе ккараб?» - абун. Аварагас ﷺ абула: «Гьаз дие гьабги-гьабги гьабуна», - ян. Цинги ЖабрагIилица, аварагасул ﷺ ракI гIодобе биччазабизе, абула: «Цо мугIжизат бихьизабизе бокьилищ дуе?» - абун. Бихьизабейин аварагас ﷺ абидал, ЖабрагIил, кIкIалалда нахъа бугеб гъотIохъ балагьана ва аварагасда ﷺ абуна, гьеб духъего ахIеян. Хирияс ﷺ ахIидал, кьолболъаги бахъун аварагасда ﷺ цебечIана гъветI. Гьанже нахъбуссинабеян ЖабрагIилица абидал, аварагас ﷺ гъотIода абуна: «Мун тIадбусса», - ян. ГъветIги букIаралъубе тIадбуссана. Нилъер хирияс ﷺ ракIбохун абула малаикасда, гIелин абун (ибну Мажагь).

Имам Муслимица бицараб хIадисалда буго, цо къоялъ аварагасда ﷺ цадахъ унел рукIанила жал. Щванила кIудияб кIкIал бугеб бакIалде. Цинги хирияв ﷺ, хIажат тIубазе, рикIкIадегIан анила. Гьесда хадуб, лъимги кодоб ккун, живги вукIанила. Бичасул авараг ﷺ сверухъе балагьанила. КигIан балагьаниги вахчизегIадинаб бакI бихьичIила, амма кIкIалал рагIалда букIанила цо гъветI, цогидаб рагIалда букIанила цоги гъветI. Цояб гъотIоде аскIовеги ун, гьелъул гIаркьелги ккун, хирияс ﷺ абунила: «Аллагьасул изнуялдалъун дида хадуб бачIа», - абун. Бухьараб варани гIадин гьеб гъветI аварагасда ﷺ хадуб бачIанила. Гьедин гьеб гъветIги бачун авараг ﷺ щванила гъобцояб гъотIохъе. Гьебги, гIаркьелги ккун, гъобцоябго гIадин хадуб цIанила аварагас ﷺ. КIиябго гъветIалда аварагас ﷺ абунила: «Аллагьасул изнуялдалъун дида сверун лъугьа», - абун. Гьеб мехалда хирияв ﷺ сверун вахчизавунила гьел гъутIбуз.

СултIан-хIажи МухIаммадов