Аварагасул ﷺ цо-цо вакъигIатал
Аварагасул ﷺ цо-цо вакъигIатал
Мурратил вас ЯгIлаца бицана: «Дида Аварагасдасан ﷺ лъабго мугIжизат бихьана: ниж гьесда цадахъ цо сапаралъ унеб мехалъ, ниж цо борхатаб, берцинаб вараниялда аскIосан унел рукIана.
Циндаго гьелда Авараг ﷺ вихьидал, гьеб данде бачIана ва гьесда цебе гIодоб бегана. Халкъалъул Хирияв ﷺ гьелда аскIов лъалхъана ва гьелъул хважаин цIехезе лъугьана. Хважаин тIаде щведал, Бичасул Аварагас ﷺ гьесда абуна: «Гьаб варани жиндие биче», – йилан. Гьев чияс абуна: «Дица гьаб гьадинго кьела!» – ян. Аварагас ﷺ абуна: «Гьадинго къваригIун гьечIо, дуца гьеб дие биче», – йилан. Вараниялъул хважаинас цин: «Нижеца гьадинго кьела гьеб», – илан абуна ва хадуб тIаде жубана: «Гьеб цо хъизамалъул варани буго, гьеб гурони гьезул магIишатги гьечIо», - ян. Халкъалъул Хирияс ﷺ абуна: «Гьалъ диде гIарз гьабуна жиб гIемер хIалтIизе тIамулин ва дагьаб кваназабулин – нуж гьелдехун лъикI рукIа», - ян.
Гьенисан рахъун ниж церехун унел рукIаго, цо бакIалда рахIат босизе чIана Бичасул Авараг ﷺ ва гьенив кьижана. Цо заманаялъ жиндирго кьалбаз ракьги бихъизабулаго цо гъветI бачIана ва, халкъалъул тIаса вищарасде тIадеги къулун, букIараб бакIалде ана. Бичасул Авараг ﷺ макьидаса ворчIун хадуб дица гьесда бицана дидаго бихьараб гIажаибаб жо. Аварагас ﷺ дида абуна: «Гьеб гъветIалъ Аллагьасдаса ﷻ изну тIалаб гьабун букIана дие салам кьезе ва Аллагьас ﷻ гьелъие гьединаб изнуги кьуна», - ян.
Гьениса унаго цо лъим бугеб бакIалде щведал Аварагасде ﷺ данде ячIана, жундуца ккурав жиндирго васги вачун, цо гIадан. Бичасул Аварагас ﷺ гьев васасул мегIер ккуна ва абуна: «Ле Аллагьасул тушман! КъватIибе бахъа, дун вуго МухIаммад – Аллагьасул Расул», – илан.
Гьенисаги рахъун ниж нижерго нухда къокъана. Гьеб сапаралдаса тIадруссунаго ниж гьебго бакIалде щведал, нижеда дандчIвана дов васасул эбел, Аварагасе ﷺ рахьги босун, чанго кьарияб гIиги бачун ячIуней. Халкъалъул Хирияс ﷺ амру гьабуна гIиял гьей гIаданалъухъе тIадруссинареян ва рахь жиндирго асхIабзабазе кьуна. Аварагас ﷺ гьелда гьикъана васасул хIал щиб бугилан. Гьелъ жаваб гьабуна гьадин: «ХIакъаб динги босун мун витIарав АллагьасхIаги, духъе вачун хадуб, рахIат хвезабулеб щибниги жо нижер васасе ккечIо», - ян. (ТIабарани).
Адаб цIунулеб хIама
ГIаишатидасан бицана: «Аварагасул ﷺ агьлуялъул букIана гIалхул хIама. Бичасул Расул рокъов гьечIеб мехалъ гьеб цIакъ басандулаан, азбаралъуб цебе-нахъе бекердулаан, гIодобего биччалароан. Халкъалъул Хирияв ﷺ рокъове щвараблъи лъан хадуб, гьеб гIодобе биччалаан ва сихIтун чIолаан, Аварагасул ﷺ рахIат киданиги хвезабулароан», - ин (АхIмад).
