Аварагас ﷺ гьижра гьаби
Аварагас ﷺ гьижра гьаби
Гьижраялъул бицунелъул нилъеда лъазе ккола гьеб цIакъ захIматаб иш букIараблъи. Маккаялдаса Мадинаялде гIага-шагарго буго 450 километр. ХIежалде щведал нилъ Мадинаялдаса Маккаялде уна машинабаздаги рекIун ва нухда бала 7-8 сагIат, кутакалда сваказеги свакала. Гьанже хIисаб гьабе, багIарараб заманалда лъелго арал гьезул.
Аварагас ﷺ бусурбабазе Мадинаялде гочине изну кьедал, гьез байбихьана Макка тезе. Гьенив хутIана цохIо Авараг ﷺ, Абубакар, ГIали ва мушрикуназ зулмуялдалъун ккун чIезарун рукIарал загIипал бусурбаби. Абубакар ва ГIали хутIана Аварагасул ﷺ амруялдалъун.
Хъизан-лъималгун цадахъ бусурбаби Мадинаялде ине лъугьиндал, мушрикиназда бичIчIана гьезие цIуни щвараблъи ва Аварагасги ﷺ Макка тезе букIин. Гьелъ гьел ургъана щибдай гьабун лъикIин абун ва хIукму ккана щибаб тухумалдаса лебалав, къуватав гIолохъанчиги вачун, киналго Аварагасде ﷺ тIаде кIанцIизе. Гьесул би киназдаго тIад бикьун, ГIабдулманафил лъималазда рецIел босизе кIвечIого букIине. Гьенир гIахьаллъаразда гьоркьов вукIана Наждалдаса вачIарав херав чиясул сураталда бугеб шайтIанги, гьелъие гьеб пикру рекIее гIуна ва гьелгун рекъана.
Аллагьасулин абуни къадар батIияб букIана. Аварагасеги ﷺ Аллагьасдасан изну щвана Мадинаялде гьижра гьабун ине. Гьеб рохалил хабар гьес Абубакарида бицана ва кIиясго къотIиги гьабуна къаси балъго Маккаялдаса къватIиреги рахъун, шагьар тедал данделъизе.
Аварагасухъе ﷺ вачIана ЖабрагIил малаик ва абуна: «Гьаб сардилъ мун дурго бусада вегуге», - ян. Аварагас ГIалиде амру гьабула жиндир бусада вегаян, ХIазрамавталдаса бачIараб гIурччинаб плащалда гъоркь вахчеян. Къурайшиязул чанго гIолилав вукIана Аварагасул ﷺ рукъги сверун ккун, гьев чIвазейилан чорокал ниятазда.
Авараг ﷺ абуни къватIиве вахъуна ва хъат цIураб ракь гьезде тирщула «Ясин» сураталъул аятги цIалулаго. Гьелдалъун гьел Аллагьас гъапуллъизарула ва Аварагги ﷺ, щибго квалквал ккечIого, къватIиве уна. Авараг ﷺ шагьар тун къватIиве ун вукIин лъайдал мушрикинал гьесда хадур рахъуна.
Аварагги ﷺ Абубакарги щола Савр абураб нохъоде ва гьенир рахчула. БачIун нусиречалъ гьениб бусенги лъола. Гьезулги ГIабдуллагь ибн Урайкъатилги къотIи букIана лъабго къоялдаса Савр нохъода данделъизе. Къурайшиял нохъодул кIалтIе щведал, Абубакарица абула: «Цояв гьанивехун балагьани, гьезда нилъ рихьилаха», - ян. Гьелъие жаваб гьабун Аварагас ﷺ абула: «Щиб дуда ракIалде кколеб кIигоясул хIакъалъулъ, жидер лъабабилев Аллагьги вугев», - абун.
ГIумар бин Сухайра вукIана гьеб нохъода гIагарлъухъ Абубакарил гIи хьихьун. Гьес Маккаялдаса цIияб хабар гьезухъе щвезабулаан. Лъабго къоялдаса Аварагги ﷺ Абубакарги къватIире рахъана ГIабдуллагь бин Урайкъатица нухги бихьизабулаго. Къурайшияз жеги чIезе тун букIинчIо гьел ралагьи ва гьел ккуразе нусго варани кьезе къотIиги гьабун букIана гьез.
