Аварагасул ﷺ ирсилазул цояв
Аварагасул ﷺ ирсилазул цояв
Аварагасул ﷺ ирслъун кколеб гIелму тIалаб гьабизе беццараб буго. ХIаракат бахъила Къуръан цIализе, азарго хIадис лъазабизе ва нус-нус тIехь цIализе.
Аварагасул ﷺ ирс босаравлъун вукIине ккани, гьеб киналдаго цадахъ, хирияв Аварагасул ﷺ берцинал тIабигIатал лъазарила ва гьезда рекъон гIумруги гьабила. ПалхIасил, жиндирго рекIелъ ругел квешал тIабигIатал нахъе инарила. Мисалалъе, гIелмуги цIалун, жиндаго живго лъикIавлъун вихьи, рияалъе гIамал гьаби, чIухIи, хIасад, гIадамал жиндего хIажаталлъун рукIине бокьи, дунял тIалаб гьаби, хьул халалъи ва гьел гурелги унтаби рекIелъа рачахъила.
Гьал унтаби живго лъугьун рекIелъа лъугIизаризе кIоларелъул, унтаби сах гьарулев тIабиб кквела ва гьес малъараб гьабила. Аварагасул ﷺ ирсилав ккола гьел унтабаздаса ракIги бацIцIалъарав, Аварагасул ﷺ тIабигIаталги ккурав, загьираб гIелмугун цадахъ жиндие Аллагьас истикъаматги кьурав, Аварагасда ﷺ жиндир силсилатги хурхарав, гьесдаса ﷺ жиндие гьеб гIелму гIадамазда малъизе изнуги щварав чи.
Гьединазул цояв вукIана Закаталаялдаса ГIабдулмутIалибил вас ГIабдулгъанийи-афанди. Гьев гьавуна ЛъаратIа районалъул ГIицIда росулъ, 1924 соналъ. Эбел Загьратгун гьев уна бетIербахъиялъе ЦIоралде ва гьелго гIадин бетIербахъиялъе рачIарал гьебго росулъа чагIазул ясги ячун, Закаталаялда вукIана гIумру гьабун. Шазалияб тIарикъаталъе гьесие изну кьуна Инхоса ГIабдулхIамид-афандияс, 1973 соналъ.
