Абадияб рокъоре къокъун аразде
Абадияб рокъоре къокъун аразде
Дагьаб цебегlан ккараб къваридаб лъугьа-бахъиналъул хlакъалъулъ хъвараб назму буго гьаб, ай щуго чи цо къоялъ рухlараб хъизамалъул хIакъалъулъ.
Бухьарабищ, Шамил, халатаб сапар,
Сайигъат щолареб, тlадруссунареб.
Тlамурабищ гали абадиялде,
Анищан гьарурал лъималгун цадахъ.
Аллагьасул салам, рахlмат, баракат
Щибаб лагаялда рещтlаге, дарман.
Иманияб хвел-хоб, ислам мухlканлъи
Насиблъун гьабеге, Аллагьас дуе.
Нужеца рукълъураб керенги турун,
Канлъи буго босун гlисинал тlанчlи.
Кие юссаниги нужги церечlун,
Цlа буго бакулеб жаниб каранда.
Балагьун гlорцlичlел чlегlерал берал,
Чlурканаб нур босун сурукълъанадай.
Дур кlалдир ругьунал маргъалул цаби
Цоцада хъвачlого рортун анадай.
Хинаб рокъор жанир ругьунал лугбал,
Рекъон ккун ругелдай къанабазда гъоркь.
Цlорораб ракьалда ругьунлъичlеб черх
Чанун савуги бан сси хун бугодай?
Кьучlдаса щущайги берцинаб мина,
Нужей хlиллаялъе хlадурун чlараб.
Хlулилъун боржаги тlад лъураб кирпич,
Киналго хъизамал цадахъ къанщарал.
Дуй йокьун ячарай хlалалай лъади
Хlурулгlинзабигун цадахъ ятаги.
Гьарухъе гьарурал гьитlинал тlанчlи,
Тlолго алжаназда жанир ратаги.
Нилъеца къадарги къотlуларелъул
Къварилъуге абе, дир эбелалда.
Къадаралде данде щивго чlечlелъул
Щулаго чlа абе ункъачабазда.
Хадур угьдунилан араб щоларо,
Хутlила нуж нижер кидаго рекlелъ.
Хвелалъ рахlму бергьун гьоркьов чи течlо,
Нух битlаги, дарман, гьечlо мун гьанже.
