Нечоларел кин нилъ

Нечоларел кин нилъ

Дун ана цо къоялъ, къватIийги яхъун,
Цо пуланаб нухалъ зияраталъе.
Заназул рукъалде, хабал рагIалде,
Ракьулъ рукъаразе дугIа гьабизе.
Гьениб дида лъачIо щибго борхалъи,
БатIалъи бихьичIо щивго чиясул.
Бечедав ватичIо, мискинав лъачIо,
ГIакъилавгун гIантав ратIа гьаричIо.
Цингиги бичIчIичIо ракьалда бугеб,
ГIорцIунгутIиялъе бугеб ишара.
ЦокIалаб ракьул гвенд нахъаги букIун,
ГIадамас гьабулеб чIухIараб гIамал.
Гьениб дур рукъалъул кIодолъиялъул,
Щибго хайир гьечIо, букIин гурони.
Дуца гьабун тараб магIишаталъул,
Щибго хIажат гьечIо нахъе тун гуреб.
Турараб черхалъе берцинлъиялъул,
Щибго хайир гьечIо, хведал тIагIараб.
Гьениб къвакIиялъул мунпагIат гьечIо,
РухI босун аралъуб жиб тIаса унеб.
Гьениб чIухIиялъул щибго хIал гьечIо,
ХIал кьун гIазабалъе хIалтIун гурони.
Гьениб лъай-хъваялъул щибго иш гьечIо,
Аллагьасулгун дур бухьен гьечIони.
Гьабун араб гIамал гIадада буго,
РекIеда чIухIиялъ кьалбал риччани.
ГIибадат чуризе налъи дур буго,
Бицунеб рагIуе гIурхъи лъечIони.
Бихьун лъалеб хабар бицуней гуро,
Хвелги далил гьечIищ чIаго ругезе.
Дирго гIамалалъул дагьлъиги бичIчIун,
ГIузру цIикIкIун кIалъай гьабун гурони...
                             ***
Дир зияраталда ракI унтун буго,
РухI кьун имамзабаз цIунун букIараб.
Дир гьаб тIалъиялда ракI бакъван буго,
Чанги захIмат бихьун хьихьун букIараб.
Гьабищ имамзабаз бидул гIорал тIун,
ЦIунараб ракьалъе хIалалаб рикъзи.
Гьабищ дунял лъачIел муридзабазе,
Бичараб рухIалъухъ кьолеб бугеб мухь?
Гьабищ намус цIунун гIурулъ кIанцIарал,
Дол гIолил ясазе гьабулеб жаваб?
Гьабищ наслаби чIван пашман рукIарал,
Къиматал хараби разилъулеб нух?
Къоло щуго соналъ хIалхьи лъачIого,
Гьалъищ имамасги гIумру бичараб?
Асир гьавуниги къуличIеб бетIер,
Гьадинищ къулилеб Шамил имамас?
Нечоларел кинал нилъ гьал мугIрукьа,
ГIассиял рагъазе нугIзаллъун ругел?
КантIуларел кин нилъ тарих рагIун,
Умумузул бидул тIирабаз хъвараб?
Гьалбал рокьуларел чагIи гуро ниж,
Адаб тараб пиша бокьун кколаро. 
РитIухъаб гIамалалъ ккун гьечIониги,
ВатIан бичи нижей рекIей гIоларо.

ПатIимат ГIабдулаева