Унел руго гьал сонал
Унел руго гьал сонал
Унел руго гьал сонал, свак лъачIого гIедегIун,
ГIумру кибдай къокълъила, къадар кидадай щвела?
Къаникье унеб сагIат, сиратI бахунеб лахIзат,
ГурхIел-рахIму лъалареб захIматабдай букIина
БакIлъи цIадирабазул кибехундай гьетIила,
Гьарунщинал мунагьал нугIзаллъундай рукIина?
КIанцIизе нохъо гуреб, вахчизе чадир гуреб,
Чан батIияб суал кьун суравдай дир босила.
Бицине жавабалъе жагъаллъунцин ккеладай,
Жанив ваккун балазе интернет-алат гуреб.
ТIаде ришват-гIарац кьун, гъоркьбакI рекъезе гьабун,
Рекъел гьечIеб гьеб пиша гьениб хIалтIуларелъул.
ХIалае батулеб дий щиб гIамалдай букIина,
РекIелъ щайтIан кIусарал къоял гIемер кканадай?
Парзал тIураниги щиб, щвалде щвей букIанадай,
Щибаб как хIузуралда базе къуват гIунадай?
Дунялияб магIишат гIетIги тIун гьабулаго,
ГьабичIого гIолареб чан гIибадатдай тана?
Хабар-калам бицунел копол данделъабазда
Кинниги гъибат-бугьтан лъачIого борчIанадай?
Бисмиллагь бахъичIого, квералцин чуричIого
Чан батIияб нигIматдай гIедегIун кванан тана.
ХIарам-хIалал лъачIого берцин бихьанщиналъул
Хьул буссине намус тун эхебедай къулчIана?
Арал дир мунагьазе тавбу рекъон кканадай,
Гьеб тавбу гьабизеги бичча-бихъан кканадай?
Гьанже араб жибго тун, ккаралдаса ракI бухIун
РахIимасда хьулги лъун хайир бахинародай?
Алжангун жужахI букIин некIого щайдай
ЛъикIаб-квешаб борцине гIакълу щайдай борчIичIеб?
Кин бугониги Аллагь, дур загIипав лагълъидал,
МахIрум гьавичIого те, ахират разияб кьун.
