ХIабиб данде вачIун ватила

БачIана цогиги талат къо тIаде,
Цоги шайихасги дуниял тараб.
Инхелоб баккараб бакъул кунчIиги,
Ссун ун рагIулилан рагIана хабар.
Жанир ракIал гIодун, бераз магIу тIун,
Къваридго щай тарал дур муридзаби.
Дунял тун аразухъ урхъараб заман,
Инагьдилел танищ тухум-кьибилго.
Дур рухI боссе тIаде ГIизраил щведал,
Щобал, мугIрул цадахъ гIодун ратила.
Дуде тIаде ракь хъван нахъ руссаралги
Зоб-ракьалъ магIу тIун риччун ратила.
Мун жанив вукIараб хIужра-рукъ жакъа,
Жаниса нурги ун бецIлъун батила.
ХIабиб  данде вачIун, Алжанги баркун,
Устарзабаз квер ккун вачун ватила.
Баркат нижейги тун вачун ватаги,
Алжаналъул ахикь рещтIун ватаги,
Абадияб рукъ дуй хIалхьияб щваги,
Рокьанщиналгун мун цолъун ватаги.
Дуда тIад рещтIараб нур ссун иналде,
ТIаде щун ратила машаихзаби.
Гьезулги ракIбакъван, къварид ратила,
Камилав къутIбуги къокъун анилан.
Къадар Аллагьасул, кире кIанцIилел,
ЛъикIаб хъван батаги Бичасул къадар.
Дунял кида тунги толеб байтулман,
Дора Алжаналда данде гьареги.
ДугIадул аманат- яцалгун вацал,
Нагагь рихьаниги рихьичIониги.

ЗАГЬИДАТ ХIАЖИМУХIАМАДОВА, ГЪИЗИЛЮРТ РАЙОН, НЕЧАЕВКА РОСУ