Дида тIаса лъугьа
Дида тIаса лъугьа
Дида тIаса лъугьа, хирияв Аллагь!
Арал дир къоязул къимат гьабичIев.
Гьабуге гIакъуба ГIарасаталда,
ГIадада замана биччан тунилан.
БахIараб мехалда ботIролъ пикраби,
ХIалтIулел рукIана хIажат гьечIелде.
БатIулаб дуниял дие хиралъун,
Халикъ, Дур парзазул кIварго гьабичIо.
Гьарулел вагIзаби гIалимзабазул,
ГIенеккичIо гьезухъ гьаваялъ гуккун.
Ихтилат-кепалда, кечI-бакъаналда,
Къоял, сардал тIамун, соналги ана.
Сонал сверанагIан сахлъи дагьлъана,
Дир чорхол чIаголъи лъугIунги ана.
Херлъи тIаде бачIун, тату хварав дун,
Хвалил бусалъ вуго бухIулеб ракIгун.
РахIманасде вуссун, хIелун гьардола,
Гьабе дида гурхIел, Дур хIалкIолелъул.
ХIалимлъи бергьарав, БетIергьан Аллагь!
ТIаса лъугьа дида, рахче мунагьал.
Гьабураб кинабго квешабщиналда,
Дир ракI бухIун буго, дун пашман вуго.
Мун рахIму цIикIкIарав, цIобал гIатIидав,
ЦIоб-рахIму лъелилан лъун буго хьулги.
Къабул гьабе, Аллагь, гьарараб гьари,
Гьарула нахъчIваге гьабураб тавбу.
Хириял, гIадамал, дир рекIел бухIи,
БукIине биччанте дарслъун нужее.
Жакъа гIолохъанаб гIужда рукIаго,
КIвараб жигар бахъе битIун хьвадизе.
Бичас тIад гьарурал паризаял жал,
Гьезде кIвар кьечIого чIваге замана.
Зина, гьекъел-мехтел, гIемер махсара,
Мунагьал хъвай гуреб, гьечIо хайирги.
Халикъасул гурхIел щвезе бокьани,
БетIергьан разияб гьабе гIамалги.
