ЦIодорлъизе васият

ЦIодорлъизе васият

Унев вуго дун гьаб дуниялги тун,

Доб ахираталде дирго сапаралъ.

Макруяб байтулман нужее тана,

Вореха, нужгIаги гуккизе чIоге.

Дир магIирукъ гьечIеб тагIзият лъоге,

Хвезе вижарасухъ гIоди гьабуге.

Зигардизе неча – Бичасда хIинкъа,

ЦIакъ берцин хьихьанин, АлхIамдулиЛлагь.

Щуго сонгун бащдаб гIасру аниги,

Лъабго къо араблъун буго дир пикру.

Расги лъачIогоха сонал сверарал,

Бекерулеб чуялъ нух толеб гIадин.

Лъабго къойилищха гIумру букIараб?

Цояб араб, цоги жакъа нилъ ругеб.

Лъабабилеб – щолищ яги щолареб,

ГIибадит гьабулеб – къо кинаб азул?

Сон къо араб буго нахъбуссунареб,

Нилъер квещлъи-лъикIлъи цадахъги бачун.

Жакъасеб гьаб къоги квещго биччани,

Метер щиб кьуниги гьабги щоларо.

Метер къо бачIана, дун кив рикIкIунев?

Яги хваразда гъорлъ мунагь чураяв.

Яги дагьалъ тарав – гъовеги унев,

Хвел нахъ гIунтIун буго, кодоб жо гьечIев.

Кодоб жо гьечIилан гьанив толаро,

ЧIорого аразе тIокIаб щоларо.

ЛъикIлъаби гьечIони – квещлъи цIикIкIуна.

Квещабги цIикIкIана, АгIазанаЛлагь!

ВорчIа пакъир гIела – гIемер кьижана,

Макьу кин бачIунеб холев чиясде.

Жигар бахъе гьанже гIибадаталъе,

 Вегизе къоял дуй гIемерал щолин.

ТIаса лъугьа Аллагь, АстагъфируЛлагь,

Мунагь гуреб гьечIин пикру гьабуни.

ГIицIаб дурго гурхIел дие щвечIони,

Жиб жужахIалдедай рещтIин букIунеб?

Хьулни къотIуларо Разикъасдаса,

ГурхIулесул бищун гурхIулесдаса.

Мунагьазулъ тIерхьун гIажизлъаниги

ТIагьа виччан телин шафагIаталъе.